«Ոտքի Հայաստան» նախաձեռնության անդամ,  ընդդիմադիր քաղաքական գործիչ Անդրիաս Ղուկասյանն ավելի քան մեկ տարի է անազատության մեջ է և չի ընդունում իրեն առաջադրված մեղադրանքները: Դատավոր Վարդան Գրիգորյանի նախագահությամբ Էրեբունի և Նուբարաշեն վարչական շրջանների ընդհանուր իրավասության դատարանում ընթանում է Անդրիաս Ղուկասյանի գործի քննությունը: Ղուկասյանի փաստաբան Կարեն Մեժլումյանը այս  դատավարությունը «խայտառակություն» է որակում: 

 Քրեական գործով  մեղադրանք է առաջադրված միայն Անդրիաս Ղուկասյանին,  տուժող է ճանաչվել 36 ոստիկան: Ըստ մեղադրանքի՝ նախորդ տարվա հուլիսի 29-ին Սարի թաղի հայտնի դեպքերի ժամանակ Անդրիաս Ղուկասյանը զանգվածային անկարգությունների կոչ է արել քաղաքացիներին, որից հետո ցուցարարները քարերով հարվածել են ոստիկաններին: Դրա հետևանքով, ըստ մեղադրանքի, տուժել է 36 ոստիկան: «Սասնա ծռեր» խմբի գործողություններից տուժած ոստիկաններին էլ են վերագրել Անդրիաս Ղուկասյանի գործին:

«Գործով տուժող ճանաչված ոստիկանների մի մասը ՊՊԾ գնդի պատանդներն են: Օրինակ՝ Վալերի Օսիպյանն այս գործով տուժող է, ոչ թե այն բանի համար, որ իրեն քարերով հարվածել են, այլ այն բանի համար, որ ինչ-որ ժամանակ պահվել է ՊՊԾ գնդում: Սա աբսուրդի ժանրից է»,- ասում է Կարեն Մեժլումյանը:

Անդրիաս Ղուկասյանին առաջադրվել է չորս մեղադրանք՝  զանգվածային անկարգություններ կազմակերպելը, ապօրինի զենք-զինամթերք կրելու, պատանդներ պահելու  և շենք-շինություններ զավթելու փորձ:  Ինքը՝ Անդրիաս Ղուկասյանը չի ընդունում իրեն առաջադրված մեղադրանքները: Նա դատարանում  հայտարարել է, որ նախորդ տարվա հուլիսին հայտնի դեպքերի պատասխանատուն Հայաստանի իշխանությունն է, համապատասխան փաստերն ու ապացույցները հենց իշխանությունների դեմ են:

Փաստաբան Կարեն Մեժլումյանը Forrights.am-ի հետ զրույցում անդրադարձել է այն խախտումներին, որոնք թույլ են տրվել քննության  և դատավարության ընթացքում: Ամենաէական խախտումն, ըստ փաստաբանի, պաշտպանական իրավունքի խախտումն է և դատավոր Վարդան Գրիգորյանի ընդգծված բացասական վերաբերմունքն իր պաշտպանյալի նկատմամբ:: Անդրիաս Ղուկասյանը դատարանում բարձրաձայնել է այս հարցը, ինքնաբացարկի միջնորդություն է հայտնել դատավորին, սակայն այն մերժվել է:

Գործով առանցքային երկու վկաներից մեկը հաշվառված է հոգեբուժարանում: Նրանք իրենց ցուցմունքներում պնդել են, որ լսել են, թե ինչպես է հուլիսի 29-ին Սարի թաղում Անդրիաս Ղուկասյանը կոչէ  արել քարեր հավաքել՝ ոստիկաններին հարվածելու համար:

Անդրիաս Ղուկասյանի գործը քաղաքական հետապնդում է  

Անդրիաս Ղուկասյանի նկատմամբ ակնհայտ քաղաքական հետապնդում է իրականացվում և նրան փակի տակ պահելու միակ պատճառը ընդդիմադիր գործունեությունն է: Նախորդ տարվա հուլիսի 29-ին Սարի թաղում հանրահավաքին մասնակցելը կոնկրետ առիթ է հանդիսացել Անդրիաս Ղուկասյանին ձերբակալելու համար: Փաստաբանի պնդմամբ  դեռևս 2016 թվականի հունիսի 20-ից, մինչ Սասնա Ծռերի դեպքը,  նրա հեռախոսը դատարանի որոշմամբ գաղտնալսվել է:

«Հիմքում դրվել է այն, որ սպասվող սահմանադրական հանրաքվեի ժամանակ Անդրիաս Ղուկասյանը իրեն անծանոթ անձանց հետ ծրագրել է  զանգվածային անկարգություններ կազմակերպել: Այն դեպքում, երբ  սահմանադրական հանրաքվեն անցկացվել էր 2015 թվականի դեկտեմբերին, այսինքն՝ դրանից մոտ 6 ամիս առաջ: Իսկ հունիսի 20-ը համընկել է այն ժամանակահատվածի հետ, երբ Անդրիաս Ղուկասյանը և ապրիլյան պատերազմի հետ կապված հետաքննություն սկսելու համար դիմել էին ՄԱԿ-ի գլխավոր քարտուղարին: Այսինքն՝ դրա հետ կապված սկսել են նրա հեռախոսը գաղտնալսել և փաստացի քրեական հետապնդում իրականացնել »,- ասում է փաստաբանը:

Անդրիաս Ղուկասյանի կալանքի երկարաձգման որոշումներն, ըստ Մեժլումյանի, առանց որևէ հիմքի են եղել: Երկու անգամ միջազգային իրավապաշտպան կազմակերպությունները դրա հետ կապված հայտարարություն են արել:

«Մենք միջնորդում էինք, որպեսզի վկաներ հարցաքննվեին, ապացույցները՝ տեսագրությունները հետազոտվեին, բայց  մերժում էին: Միջնորդում էինք, որպեսզի փորձաքննություններ նշանակեին, մերժում էին: Այսինքն՝ այն ամենը, ինչը գործի քննությանը օբյեկտիվ պատկերը կարող էր տալ, և դրանից կերևար, թե Անդրիասը նման արարք գործել է, թե ոչ, նախաքննության ամբողջ ընթացքում մերժել են: Մերժվել են նաև առերեսումները Անդրիասի դեմ ցուցմունք տված անձանց հետ: Մենք նախաքննության փուլում հարցադրում էինք անում՝ լավ, այս գործը ո՞նց են դատարան տանելու, ո՞նց կարելի է»,- տարակուսում է Մեժլումյանը:

Այն, որ Անդրիաս Ղուկասյանի նկատմամբ քաղաքական հետապնդում է իրականացվում, փաստաբաններն ահազանգել էին դեռևս նրա կալանավորման փուլում: Երբ նախորդ տարվա օգոստոսին Վերաքննիչ քրեական դատարանը մերժել էր Անդիաս Ղուկասյանի ձերբակալման, ինչպես նաև կալանքի դեմ տարված բողոքները: Դատավորը հարցրել էր Անդրիաս Ղուկասյանին, եթե նա ազատ արձակվի, արդյոք շարունակելո՞ւ է իր ընդդիմադիր գործունեությունը: Անդրիաս Ղուկասյանը դրական պատասխան էր տվել: Փաստաբանի գնահատմամբ այս հանգամանքն ինքնին ապացույց է այն բանի, որ Անդրիաս Ղուկասյանը քաղբանտարկյալ է:

Անդրիաս Ղուկասյանին թույլ չեն տալիս դատարանում ցուցմունք տալ

Ձերբակալությունից հետո մինչև օրս Անդրիաս Ղուկասյանը զրկված է կապի բոլոր միջոցներից ու հաղորդակցվելու հնարավորությունից: Նրան թույլ չեն տալիս դատարանում ցուցմունք տալ: Փաստաբանն ասում է խախտվում է ամբաստանյալի ամենապարզ իրավունքը՝ ցուցմունք տալը

«Դա իր պաշտպանության միջոցներից մեկն է, բայց դատարանն ասում է՝ դու ցուցմունք կտաս, երբ վկաները, տուժողները և  այլ անձինք հարցաքննվեն: Իսկ այդ անձանց թիվը մոտ 100-ն է», ներկայացնում է փաստաբանը՝ հավելելով, որ իր պաշտպանյալը հնարավորություն չունի արձագանքել վկայի ցուցմունքին՝ դատարանն արգելում է:

«Օրինակ՝ գործով գլխավոր վկա Գեղամ Սահակյանը ցուցմունք է տալիս դատարանում, բայց նախաքննական ցուցմունքը չի հարապարակվում, որպեսզի իմանանք, թե ինչն է սխալ ասում: Այսինքն՝ մեր իրավունքները ոտնահարում են, որպեսզի իրենք չխայտառակվեն»,- ասում է փաստաբանը:

Ապացույցների հետազոտման փուլում փաստաբանը միջնորդել է, որ վկաների, տուժողներին և այլոց ցուցմունքներից առաջ նախ ցուցմունք տար Անդրիաս Ղուկասյանը, նաև՝  հետազոտվեն գործում եղած ապացույցները, սակայն մերժում են ստացել:

«Այն, ինչ այսօր դատավոր Վարդան Գրիգորյանն է անում, արդար դատաքննություն ակնկալելու ոչ մի հույս չի տալիս»,- ասում է Մեժլումյանը:

«Մենք այս դատավարությամբ նաև հակված ենք միջազգային ատյաններին ցույց տալու, թե ինչ ապօրինություններ են կատարվում այստեղ: Դատարանն արգելեց նաև վկաների հարցաքննության նկարահանումը: Այսինքն՝ փորձում են փակ միջավայրում իրենց գործն անել, որպեսզի այս գործը հնարավորինս քիչ հնչեղություն ստանա»,- ասաց Մեժլումյանը:

Անդրիաս Ղուկասյանի գործը իշխանությունների կողմից իջեցված պատվեր է

Իրավապաշտպան Վարդան Հարությունյանը կարծում է, որ սա իշխանությունների կողմից պատվիրված հերթական շինծու գործն է: Դատարանին ու նախաքննական մարմնին, նրա խոսքով, այս գործով հանձնարարականներ են իջեցվել:

«Խնդիր է դրված Անդրիաս Ղուկասյանին անպայման պատժել, և նրանք պատժում են: Այս պայմաններում խոսել արդարադատության, արդար դատաքննության ու նախաքննության մասին, տեղին չէ: Այստեղ պետք է խոսենք իշխանությունների կողմից իջեցված պատվերի կատարման մասին»,- ասում է իրավապաշտպանը:

Վարդան Հարությունյանի խոսքով՝ ստեղծվել է մի իրավիճակ, որ ՀՀ-ում հասարակական ու քաղաքական գործիչն իր արտահայտած դիրքորոշման ու գործունեության համար հայտնվել է բանտում: Եվ այդպես շատերն են այսօր հայտնվել բանտերում իրենց քաղաքական հայացքների համար,  հատկապես 2000 թվականից այս կողմ միշտ էլ Հայաստանում եղել են հասարակական-քաղաքական գործիչներ, ովքեր իրենց հայացքների համար հայտնվել են ճաղերի հետևում:

forrights.am