Առողջ մարդիկ պետք է տարեկան գոնե մեկ անգամ կանխարգելման կարգով զարկերակային ճնշումը չափեն: Հունիսի 9-ին՝ լրագրողների հետ հանդիպման ժամանակ այս մասին ասաց Սրտաբանների հայկական ասոցիացիայի նախագահ, Երեւանի գլխավոր սրտաբան Պարունակ Զելվեյանը:

Նրա խոսքով՝ ճնշումը պետք է չափել նաեւ որոշակի բողոքների առկայության դեպքում, ինչպես նաեւ ցանկացած առիթով բժշկին յուրաքանչյուր այցելության ժամանակ:

Իսկ եթե մարդը գերճնշում ունի, ապա նա պետք է ճնշման տնային մշտադիտարկում կատարի՝ բուժման ճիշտ կիրառման համար:

«Մենք հիպերտինիկներին առաջարկում ենք ճնշումը չափել օրական երկու անգամ՝ առավոտյան եւ երեկոյան, ինչպես նաեւ ցանկացած ժամանակ բողոք առաջանալու դեպքում՝ գլխապտույտ, գլխացավեր եւ այլն»,- ասաց նա:

Ինչպես նշեց Պարունակ Զելվեյանը, հիպերտոնիա է համարվում 140/90-ից բարձր զարկերակային ճնշումը: Խոսելով այն մասին, որ Հայաստանում կանանց շրջանում տարածված է նաեւ ցածր ճնշումը՝ բժիշկը նշեց, որ գերցածր ճնշումը, եթե, իհարկե, ցուցանիշներն այնքան ցածր չեն, որ բժշկական միջամտություն անհրաժեշտ լինի, չի կարելի հիվանդություն համարել. այն պետք է որպես առանձնահատկություն ընդունել:

Գիտնականները հայտնել են, որ կենցաղային տոնոմետրերը ունեն անճշտություններ, ինչն արդյունքում կարող է ազդել մարդու ինքնազգացողության ու նրա բուժման ռազմավարության վրա։ Նրանց հետազոտությունը, որի ժամանակ փորձարկվել են կենցաղային տոմոնետրերը, ցույց է տվել, որ դեպքերի 70 տոկոսում այդ սարքերի անճշտությունը կազմում էր մոտ 5 մմ սնդիկի սյուն, իսկ 30 տոկոսում՝ մոտ 10 մմ սնդիկի սյուն։

«Բժիշկները հաճախ են ապավինում կենցաղային տոմոնետրի ցուցումներին, որոնք նրանց հայտնում են հիվանդները՝ սահմանափակվելով կլինիկայում մեկ անգամ ճնշում չափելով։ Նման մոտեցման դեպքում հիվանդության լրջությունը կարող է զգալիորեն թերագնահատվել։ Ճնշման մանրակրկիտ մոնիտորինգը կարող է նվազեցնել հիպերտոնիայի կրիտիկական հետեւանքները՝ բայց միայն այն դեպքում, եթե ճնշման չափումները ճշգրիտ լինեն»,- նշում է Ռինգռոուզը։

Փորձագետները համարում են, որ բժիշկներն ու հիվանդները պետք է հաշվի առնեն կենցաղային տոնոմետրերի հնարավոր անճշտությունները։ Նաեւ հիշեցնում են, որ տվյալների մեջ անճշտություն կարող է առաջանալ նաեւ մարմնի ու ձեռքի շարժումից, սխալ ամրացված մանժետից, հիվանդի չափազանց մեծ քաշից, զգացմունքային վիճակից, չափման ժամանակ խոսելուց։ Նաեւ հետազոտողները շեշտում են, որ բժիշկները ոչ մի դեպքում չպետք է դեղորայք նշանակեն միայն մեկ կամ երկու չափումների հիման վրա։