«Ստեփանակերտի օդանավակայանից ավիացիոն թռիչքներ լինում են, բայց դրանք փոքր ավիացիոն թռիչքներ են, որոնք օգտագործվում են տարբեր բնագավառներում»,- այս մասին armtimes.com-ի հետ զրույցում ասաց Արցախի Հանրապետության նախագահի մամուլի խոսնակ Դավիթ Բաբայանն՝ անդրադառնալով Ստեփանակերտի օդանավակայանից «Yell Park» ընկերության կողմից իրականացվող ներհանրապետական թռիչքներին:

Նշենք, որ այս ընկերությունն արդեն բարեհաջող թռիչքներ է իրականացնում Ստեփանակերտից դեպի Արցախի այլ քաղաքներ: Ինքնաթիռները երկտեղանի են՝ անհամեմատ փոքր ուղեւորափոխադրում իրականացնող ինքնաթիռներից:

Դավիթ Բաբայանը նկատում է, որ Արցախի մայրաքաղաքից թռիչքներ նաեւ իրականացվում է ուղղաթիռներով, սակայն վերջին թռիչքների ժամանակ նաեւ նկարահանումներ են արվում եւ այլն: «Լինում են դեպքեր, երբ ուղղաթիռով քաղաքական, ռազմական ղեկավարներ են թռչում, միջազգային կազմակերպություններից, տարբեր երկրներից ներկայացուցիչներ են գալիս»,- ասաց Դավիթ Բաբայանը՝ նշելով, որ հիմնական խնդիրը Ադրբեջանի ապակառուցողական քայլերին են՝ մեծ ավիացիան խոսելու հայտարարությունների տեսքով:

«Դա ահաբեկչության վառ դրսեւորում է: Սա է խնդիրը, իսկ փոքր ավիացիան, որը թռիչքներ է իրականացնում Արցախի ներսում, ինչպես նաեւ ողղաթիռները, յուրահատկություն ունեն. այդքան էլ բարձր չեն թռչելու եւ այլն, ավելի դժվար խոցելի են: Ուղեւորափոխադրումների հարցը դեռեւս մեր օրակարգում է, դա չի հանվել, բայց դեռ լուծված չէ»,- նշեց Դավիթ Բաբայանը:

Արցախի նախագահի խոսնակը չի ցանկանում այս թռիչքները առկայության հանգամանքը կապել ուղեւորափոխադրում իրականացնելու հնարավորության հետ:

Անդրադառնալով փոքր ավիացիոն թռիչքների հաշվին Արցախում տուրիստական հոսքերի շատացմանը՝ նա ասաց, որ դրական առումով այդ թռիչքներն ազդելու են տուրիզմի զարգացման վրա: «Եւ՛ ճանապարհն է կրճատվում, եւ ամեն տեսանկյունից, բայց սա, իհարկե, իր մեջ մարդասիրական բաղադրիչ է պարունակում: Շատ են դեպքերը, երբ մարդկանց պետք է շտապ տեղափոխել, օրինակ Երեւան կամ այլ տեղեր, հաճախ խնդիրներ են առաջանում»,- նշեց Դավիթ Բաբայանը:

armtimes.com