«Սասնա ծռեր» խմբի անդամ Հովհաննես Հարությունյանի պաշտպան Հայարփի Սարգսյանի կարծիքով՝ իր պաշտպանյալի նկատմամբ միտումնավոր քայլեր են ձեռնարկվում:

«Ամեն անգամ ասում են՝ շուտով կվիրահատենք: Վերջին անգամ ասել են, որ այս շաբաթվա վերջ պիտի վիրահատեին: Այդպես էլ չիրականացավ վիրահատությունը: Ասում են՝ մի տաս օրից, մինչև վերքը լավանա: Ամեն դեպքում Հովհաննես Հարությունյանի վիճակը լավ չէ այն առումով, որ նա նորմալ չի ցավազրկվում, ամեն օր չէ, որ վիրակապերը փոխվում են: Երեկ արդեն չորրորդ օրն էր, որ նոր վիրակապը փոխել էին: Բացի այդ, ոտքի մատներն արդեն երեք օր է՝ չի կարողանում շարժել»,- NewsBook-ի հետ զրույցում հայտնեց Հայարփի Սարգսյանը:

Փաստաբանը տեղեկացրեց, որ այսօր խոսել է Հովհաննես Հարությունյանին բուժող բժշկի հետ:

«Նախ սկզբից ասում էր, որ չի կարող պատահել, ամեն օր վիրակապը փոխում են, չի կարող պատահել՝ մատները շարժում է: Հետո արդեն երբ պնդեցի, որ այցելում եմ, որ ականտես եմ եղել, ասաց՝ դուք խանգարում եք մեզ, որ մենք իրեն բուժենք, մի ստից բանը դրոշակ եք սարքում, էլ չզանգեք: Ասացի՝ դուք բուժող բժիշկն եք, ես էլ պաշտպանն եմ, պիտի զանգահարեմ: Ամեն դեպքում, գիտեք խնդիրը որն է, որ վերջում ասում է, որ ոտքերի մատները չի շարժում, հետագայում կանցնի, վիրակապն էլ ամեն օր պարտադիր չի փոխել, ինչն, իհարկե, ինձ զարմացնում է»,- ասաց պաշտպանը:

Անդրադառնալով իր և Հովհաննես Հարությունյանի անունից ներկայացված պահանջին՝ Հայարփի Սարգսյանը նշեց, որ այն ուղարկվել է որպես ի գիտություն:

«Որևէ պատասխան դրանից չեմ ակնկալում: Պահանջի մեջ նշել եմ նաև, որ եթե վիրահատությունը տեղի ունենա «Դատապարտյալների հիվանդանոց»-ում, այլ ոչ թե քաղաքացիական, և եթե հետագայում բարդություններ առաջանան Հովհաննես Հարութությունյանի առողջաական վիճակի հետ կապված, ապա ողջ պատասխանատվությունը կրելու են նշված կառույցների ղեկավարները: Դա կդիտարկվի որպես դիտավորություն և խոշտանգում»,- ընդգծեց մեր զրուցակիցը:

Այն, ինչ կատարվում է այժմ Հովհաննես Հարությունյանի նկատմամբ, պաշտպանը որակում է որպես խոշտանգում:

«Ես դա խոշտանգում եմ համարում, քանի որ եթե եթադրենք, որ 10 օրից պետք է վիրահատվի, ապա ինչո՞ւ է նա ամեն օր ցավերի մեջ, նորմալ չի ցավազրկվում, ինչո՞ւ է վիրակապը 4 օրը մեկ փոխվում, դա նորմալ չէ: Այսինքն՝ բուժհսկողություն չկա: Վերլուծելով այն, ինչ ես եմ տեսնում, և այն, ինչ իրենց կողմից ասվում է, հասկանում եմ, որ այստեղ ինչ-որ միտումնավոր քայլեր են արվում Հովհաննես Հարությունյանի նկատմամբ, որովհետև այս պահին իրենց պատասխանն ինձ չհամոզեց: Բացի այդ, նշում են, որ «Էրեբունի» ԲԿ-ից բժիշկներ կան այնտեղ: Մի օր Հովհաննես Հարությունյանն ասել է, որ իր վիրակապը փոխեն, բժիշկն էլ պատասխանել է, որ իր մոտ «բինտ» չկա: Որ բժիշկն իր մոտ բինտ չունի, ինչի՞ համար է այնտեղ: Իրենք պարզապես իրականությունը չեն ներկայացնում, ինչը հենց այդ միտումնավոր քայլերի հետևանքն է»,- ասաց Հայարփի Սարգսյանը:

Հիշեցնենք, որ Հովհաննես Հարությունյանը վիրավորվել էր հուլիսի 26-ին և տեղափոխվել հիվանդանոց: Հովհաննեսին մեղադրանք է առաջադրվել ՀՀ քրեական օրենսգրքի 219-րդ հոդվածի 3-րդ մասի 1-ին կետի և 235-րդ հոդվածի 3-րդ մասի հատկանիշներով, ինչպես նաև նրա նկատմամբ որպես խափանման միջոց է ընտրվել կալանավորումը:

Նյութի աղբյուրը ` Newsbook.am