Մի քանի օր է՝ համացանցում բավականին հետաքրքիր քննարկումների տեղիք է տվել ոստիկանության օպերատոր Արամ Պողոսյանի աշխատանքից ազատվելու տեղեկությունը: Հաշվի առնելով Արամի՝ ոստիկանության համակարգից հեռանալու ժամանակահատվածը՝ մարդկանց մի մասը ցնծության մեջ է՝ կարծելով, թե Խորենացու եւ Սարի թաղի դեպքերն են իրենց ազդեցությունը գործել:

Արամ Պողոսյանն այսօր պատասխանեց մեր մի քանի հարցերին: Նա նշեց, որ ոստիկանության համակարգից դուրս է եկել անձնական խնդիրների պատճառով եւ շարունակում է հարգել իր գործընկերներին:

«Աշխատանքից դուրս եմ եկել ֆինանսական խնդիրների պատճառով: 114 հազար դրամ աշխատավարձս չէր բավարարում ընտանիքս պահելու համար: Հիմա մատուցող եմ աշխատում ռեստորաններից մեկում եւ չնայած սահմանված աշխատավարձ չկա, բայց կարծում եմ մի քանի անգամ բարձր կլինի»,- ասաց Արամ Պողոսյանը, ով 3-ամյա երեխա ունի:

Մեր հարցին, թե ի՞նչն է պատճառը, որ նախորդից այդքան տարբեր աշխատանք է ընտրել՝ Պողոսյանը պատասխանեց, որ ժամանակ չի ունեցել ընտրելու, համաձայնել է առաջին իսկ առաջարկին: «Ես ընտանիք եմ պահում եւ ցանկացած օր կարող է ճակատագրական լինել: Չնայած այստեղ էլ եմ ծառայում ժողովրդին»,- փորձեց նմանություն գտնել ոստիկանության նախկին աշխատակիցը:

Մեր ճշտող հարցին, թե իր որոշման վրա արդյո՞ք չի ազդել Խորենացիում եւ Սարի թաղում տեղի ունեցածը՝ Պողոսյանը պատասխանեց.
«Պետական ցանկացած կառույց շատ հարգում եմ: Լինի դա ցուցարար, լինի ոստիկան՝ ես հասկանում ու հարգում եմ, դա իմ էությունն է: Ես աշխատանքից դուրս եմ եկել անձնական խնդիրների պատճառով»:

Խոսելով Սարի թաղում կիրառված բռնության մասին՝ «02»-ի նախկին օպերատորն ընդգծեց. «Ծառայողներ կային, որոնք իրենց լիազորություններն անցել են: Ես ինչքանով տեղյակ եմ, դիտարկվում է այդ ամենը, ծառայողական քննություն է նշանակվում, պատժվում են…Ես քաղաքականությունից ոչինչ չեմ հասկանում, չեմ կարող գնահատել»: Նա, սակայն, վստահեցրեց, որ այն ոստիկանները, որոնք ուժ են կիրառում, վատ վերաբերվում ցուցարարների նկատմամբ՝ չեն հարգվում նույնիսկ իրենց կոլեգաների կողմից:

«Ծեծուջարդի հրաման չի լինում, ուղղակի մարդիկ կան, որ առիթից օգտվում են, նման քայլեր են անում, բայց սկսած սերժանտից մինչեւ վերադաս այդ քայլը չեն հարգում»,- վստահերցեց Արամ Պողոսյանը:

Հարցին՝ այդ դեպքում ինչո՞ւ են ծեծում, նախկին օպերատորը պատասխանեց. «Դե կարող է այդ պահին հոգեկանը խանգարվի, չեմ կարող բացատրել, մտնել հոգեկանի մեջ, բայց եթե ես տեսնեի՝ կկանխեի»:

Հոգեկանի մասին Արամ Պողոսյանի խոսքը շարունակելով հիշեցրինք հայտնի տեսանյութի մասին եւ հետաքրքրվեցինք, թե ի՞նչ դեղահաբեր են օգտագործում ոստիկանները՝ ակցիաները ցրելուց, բռնություն կիրառելուց առաջ:

«Այդ տեսաերիզը ես էլ եմ տեսել, որ հրապարակվել է, բայց եթե իմ տեսանկյունից նայեմ, նման բան չի կարող լինել: Տրամաբանության մեջ չի տեղավորվում. ոստիկանը պայքարում է թմրանյութեր օգտագործողների դեմ, ինքն օգտագործո՞ւմ է»,- իր տեսած կադրերը անհավանական համարելով՝ օպերատորն ընդգծելով, որ ոստիկաններն առանց այդ էլ հատուկ պատրաստություն են անցնում եւ սովոր են նման վիճակներում աշխատել:

«Հնրավո՞ր է վերադառնաք ոստիկանություն՝ աշխատանքի»,- վերջում փորձեցինք ճշտել Արամ Պողոսյանից. «Այո, երբ ֆինանսական խնդիրները լուծվեն»,- եղավ նրա պատասխանը:

armtimes.com