«Հանդիպումն իրոք շատ կարևոր է եղել, որովհետև բանակցային գործընթացն այս քառօրյա պատերազմի, Ադրբեջանի ցուցաբերած ագրեսիայի հետևանքով կոմայի մեջ էր ընկել, և սա վերակենդանացման մի կարևոր լիցք է եղել: Ճիշտ է` գործընթացը դեռևս կոմայի մեջ է գտնվում, բայց այդ լիցքը շատ կարևոր էր»,- ասաց Բաբայանը:

Նա առանձնացրեց հանդիպման ամենակարևոր արդյունքները.

«Առաջինը շեշտվեց, որ անհրաժեշտ է պահպանել 1994-1995 թվականների ձեռք բերված պայմանավորվածությունը, ինչը շատ կարևոր է և նշանակում է, որ ցանկացած փորձ` ուժի միջոցով փոխել ռազմաքաղաքական դասավորվածությունը և հավասարակշռվածությունը, անընդունելի է: Այդ պայմանագրերը եղել են եռակողմ, այսինքն` Արցախի Հանրապետությունը լիարժեք ձևով մասնակցել է դրանց, հետևաբար, եթե դրանք պահպանվել են, ուրեմն պետք է, որ Արցախը մասնակցի այդ գործընթացին: Շատ կարևոր է եղել այն, որ շեշտվել է հետաքննական մեխանիզմների ներդրման մասին: Մենք բազմաթիվ անգամներ ասել ենք, որ հակամարտությունն ունի տարբեր հարկեր և պետք է սկսել ստորին հարկից կառուցել այդ շենքը, եթե ստորին հարկն անտեսվում է, ինչպես եղել է մինչ այդ, ապա հիմքն ամուր լինել չի կարող: Պետք է լինեն հստակ մեխանիզմներ, որոնք թույլ կտան ֆիքսել զինադադարի ռեժիմի խախտումների վայրը, ժամը և խախտողին»:

Բաբայանի խոսքով`այս ամենն Ադրբեջանի սրտով չէ, բայց այդ երկիրը ստիպված պետք է ընդունի:

«Կրկնում եմ` ես վարդագույն ակնոցով չեմ նայում այդ ամենին, Ադրբեջանը թեպետ ընդունել է, բայց ամեն ինչ անելու է` պրակտիկորեն խոչընդոտելու գործընթացին: Դա, իհարկե, արդեն միջազգային հանրության և ՄԽ համանախագահների խնդիրն է, իրենք էլ պետք է ամեն ինչ անեն, որ սահմանափակեն ագրեսորի այս քայլերը: Դա կպահանջի տեխնիկական և մարդկային լրացուցիչ ռեսուրսներ: Տեխնիկականն այն է, որ, միգուցե, սահմանի ողջ երկայքով տեղադրվեն ինչ-որ սարքավորումներ: Դա կպահանջի, որ հետագայում արբանյակներից մշտադիտարկումներ կատարվեն, ԵԱՀԿ գործող նախագահի անձնական ներկայացուցչի գրասենյակը, որը կա Երևանում, Բաքվում և Ստեփանակերտում, Թիֆլիսում, պետք է համալրվեն համապատասխան մասնագետներով, պետք է աշխատանքները տարվեն բազմաթիվ հարթություններում, բազմաթիվ գերատեսչությունների միջև: Սա համապարփակ գործընթաց է, որ նաև երկարատև է լինելու»:

Անդրադառնալով այն հանգամանքին, որ Վիեննայում կայացած հանդիպման ընթացքում էլ Ադրբեջանը շարունակել է խախտել հրադադարի ռեժիմը, որի ընթացքում հայկական կողմը մեկ զոհ ունի` Բաբայանն ընդգծեց` իր ասածը, որ Ադրբեջանը ձևականորեն ու տեսականորեն ընդունելու է պայմանավորվածությունը, բայց պրակտիկորեն շարունակելու է խախտումներ անելը, ապացուցում է նաև այդ: «Պետք է միջազգային հանրությունն ավելի հասցեական և կոշտ դիրքորոշում ցուցաբերի, որովհետև սա արդեն նշանակում է անհարգալից վերաբերմունք նաև գերտերությունների նկատմամբ»,- եզրափակեց Բաբայանը: