«Իսլամական պետություն» ահաբեկչական խմբավորման գրոհայինները տեսանյութ են հրապարակել, որում Ռուսաստանին սպառնում են շատ շուտով նոր ահաբեկչություններ կազմակերպել։ Այս մասին հայտնում է SITE մոնիթորինգային գործակալությունը, փոխանցում է Gazeta-ն՝ վկայակոչելով Reuters գործակալությունը։

Տեսագրությունը ռուսերեն է, այնտեղ ասվում է. «Շուտով, շատ շուտով արյան գետեր են հոսելու»: Անցյալ տարվա սեպտեմբերին զինյալները համացանցում տեսագրություն էին տեղադրել` սպառնալով Կովկասում պատերազմ սկսել, այդ թվում նաեւ Չեչնիայում: Դիմելով ՌԴ նախագահ Վլադիմիր Պուտինին՝ ահաբեկիչներից մեկն ասել էր, որ իրենք մտադրություն ունեն «ազատագրել»  Չեչնիան եւ Կովկասն այնտեղ «Իսլամական խալիֆայություն» ստեղծելու նպատակով: Չեչնիայի ղեկավար Ռամզան Կադիրովը պատասխանել էր. «Ես ամենայն պատասխանատվությամբ հայտարարում եմ` նա, ով կհամարձակվի Ռուսաստանին սպառնալ եւ արտասանել մեր նախագահ Վլադիմիր Պուտինի անունը, կոչնչացվի այնտեղ, որտեղ նա ասել է դա»:

2014թ.-ի հոկտեմբերին ԻՊ-ի հրամանատարներից Թարխան Բատիրաշվիլին, ով հայտնի է որպես Օմար ալ-Շիշանի, խոստացել է իր հետ բերել հազար իսլամիստների եւ «վրեժ լուծել Մոսկվայից»: Ավելի ուշ մի քանի անգամ լուրեր տարածվեցին, որ Շիշանին մահացել է, այդ մասին ասել է նաեւ Կադիրովը:

Սեպտեմբերի 30-ից Ռուսաստանի ռազմաօդային ուժերն ավիահարվածներ են հասցնում Սիրիայում «Իսլամական պետության» դիրքերի ուղղությամբ: Բացի Մոսկվայից, Սիրիայում ահաբեկիչների դեմ պայքարում են նաեւ սիրիական ընդդիմությունը, քուրդ ապստամբները, ինչպես նաեւ ԱՄՆ-ի գլխավորությամբ ստեղծված միջազգային կոալիցիան: