Աշխարհին ցնցել էր Չիլիի հանքափորների պատմությունը, ովքեր մնացել էին հողի խորքերում գտնվող հանքերում: Եվ այդ պայմաններում ոչ միայն կենդանի էին մնացել, այլև դիմացել էին 17 օր: Նրանց այնտեղից դուրս բերելու գործողություններին հետևում էր ողջ աշխարհը:

«Չիլիում փլուզված հանքերից 33 հանքափորների փրկությունն այնպիսի հրաշք էր, որն անգամ աթեիստները չեն կարող հերքել»,- հարյուրավոր քրիստոնյաների ասել է փրկված հանքափորներից մեկը:

Խոսե Էնրիկեսը եկեղեցու բեմից վկայել է Աստծո մասին, Ով իրեն և մնացած 32 հանքափորներին փրկել է մահից:

Նա ասել է, որ միայն այն, որ իրենք կենդանի են մնացել առաջին 17 օրերի ընթացքում, մինչ կարողացել են կապ հաստատել դրսի հետ, արդեն իսկ հրաշք է:

Երբ տղամարդիկ գիտակցել են, որ միայն հրաշքը կարող է իրենց դուրս բերել այդտեղից, հենց Էնրիկեսին են դիմել, ով հայտնի էր՝ որպես հովիվ: Մարդիկ դիմել են նրան, որպեսզի իրենց առաջնորդի աղոթքի:

Հանքափորները տարբեր հավատքներ դավանող մարդիկ են եղել, մի քանիսը, անգամ, աթեիստներ, բայց բոլոր 33-ն էլ մասնակցել են աղոթքներին:

«Մենք բոլորս մի աղոթք ու մի նպատակ ունեինք: Մենք աղոթում էինք՝ «Տե՛ր, բացիր մեզ համար փրկության դուռը: Բացի Քեզնից՝ ոչ ոք չի փրկի մեզ»»,- ասում է Էնրիկեսը:

Աղոթքի հավաքույթները շուտով վերածվել են Աստվածաշնչի ուսումնասիրման հավաքույթների, որոնց ժամանակ Էնրիկեսը քարոզել է հիշողությամբ, իսկ մարդիկ միասին երգել են երկրպագության երգեր:

«Ամենօրյա աղոթքներից հետո Աստծո ներկայությունն ավելի զգայուն էր դառնում,- պատմում է Էնրիկեսը,- սկզբում քաոս և հիասթափություն էր տիրում: Մենք բոլորս տարբեր կերպ էինք արձագանքում: Բայց աղոթքի միջոցով մեր սրտերը փոխվում էին, և մենք մի նպատակի շուրջ էինք համախմբվում: Վախը նահանջում էր, հույսը՝ բարձրանում»:

Հավատքի առաջին մեծ փորձությունը նրանց դուրս բերելու առաջին անհաջող փորձն էր: Բայց նրանք չէին հանձնվում, ընդհակառակը, դա ստիպում էր նրանց ավելի ուժեղ աղոթել, որպեսզի Աստված օգնի փրկարարներին գտնել իրենց:

«Երկրոդ փորձի ժամանակ փրկարարները կարողացան անցք բացել հենց այն հատվածում, որտեղ հավաքված էինք մենք,- պատմում է Էնրիկեսը,- բոլորը՝ նույնիսկ աթեիստները, համաձայնվեցին, որ դա հրաշք է»:

Դրանից հետո նրանք սկսում են աղոթել օրական երկու անգամ: Սնունդ, դեղորայք ու հաղորդագրություններ հարազատներից փոխանցում էին անցքի միջոցով: Բայց երբ փակուղու մեջ գտնվողներից յուրաքանչյուրը ստացավ փոքրիկ Աստվածաշունչ, նրանք սկսեցին ավելի փոխվել:

«Աստվածաշնչի ուսումնասիրությունն ու Խոսքի քարոզչությունը սկսեցին փոխել կյանքեր, ինչպես որ միշտ է տեղի ունենում»,- ասում է Էնրիկեսը:

Անգամ փրկվելուց ու տուն վեռրադառնալուց հետո Աստծո Խոսքը շարունակում է ապրել այդ մարդկանց մեջ ու փոփոխություն բերել շատերի ընտանիքներում: Նախկին ընտանեկան վեճերը վերածվում են ավետարանչության, ինչպես վկայում են հանքափորների կանայք:

Փորձության վերջում 22 հաքափորներ Հիսուսին ընդունել են՝ որպես իրենց Տեր և Փրկիչ:

«Ոչ ոք չի կարող հերքել այն, ինչ մենք վերապրեցին հանքերի խորքերում: Մենք Աստծո զորության վկաներն ենք և այն բանի, թե ինչ Նա արեց այնտեղ: Շատերն իրենց կանանց հետ վատ փոխհարաբերություններ ունեին, բայց սկսեցին սիրել ու հասկանալ նրանց:

Երբ ես ընկերներիս այցելեցի հիվանդանոցում, նրանք բոլորն օրհնում էին Տիրոջ անունը, որ Նա արեց դա իրենց կյանքում: Նրանք բոլորն էլ Աստծո հետ իրական հանդիպում էին ունեցել այնտեղ՝ ներքևում:

Ես սովորեցի լինել ավելի հանդուրժող ու համբերատար: Մենք բոլորս դաս ստացանք Աստծուց այնտեղ՝ ներքևում»,- ասում է Էնրիկեսը:

Աստծո անկասկած ներկայությունը դրդել էր այդ 33 տղամարդկանց վերեբերվել Նրան՝ որպես 34-րդ Անձի, Ով իրենց հետ էր այդ ամբողջ ժամանակ հանքի խորքում:

Էնրիկեսը պատմում է. «Մենք սկսեցինք զգալ այդ Ընկերոջ ներկայությունը, այդ անտեսանելի Հանքափորին: Մենք չէինք կարող տեսնել Նրան, բայց Նա այնտեղ էր՝ մեզ հետ: Մենք այնտեղ 33-ով չէինք, այլ՝ 34-ով, և մենք բոլորս էլ հասկանում էինք դա»:

Հեռուստաընկերությունը նկարահանել է այն պահերը, երբ Էնրիկեսն ու մյուս հանքափորներն իրար հետևից դուրս են գալիս՝ իրենց վերնաշապիկների վրա «Շնորհակալություն Աստվա՛ծ» գրությամբ, ոմանք նույնիսկ ծնկի էին գալիս և սկսում աղոթել. այդպես իրենց շնորհակալությունն էին հայտնում Աստծուն՝ իրենց կյանքը փրկելու համար:

Աստծո ներկայությունն այդպես վերապրելուց հետո Էնրիկեսը ճանապարհորդում է ամբողջ աշխարհով, պատմում իր վկայությունն ու խոսում կենդանի Աստծո մասին, Ով պատասխանում է իրեն կանչողների աղոթքներին:

Էնրիկեսի կարծիքով՝ այս դեպքն Աստված օգտագործում է, որպեսզի մարդկանց բացահայտի իր սերն ու հրավիրի վերադառնալ իր մոտ:

«Այնքան շատ դեպքեր են տեղի ունենում ամեն օր: Մենք գիտենք, որ հազարավոր մարդիկ են մահանում ամեն օր, բայց այս դեպքն ինչ-որ պատճառով Աստված առանձնացնում է,- Բրիտանիայում վկայելիս ասել է նա,- ես չեմ եկել այստեղ ուղղակի զվարճանքի համար: Ես եկել եմ, քանի որ իմ սիրտը շնորհակալությամբ վկայում է Աստծո ողորմության և շնորհքի մասին: Իմ այստեղ գտնվելու միակ պատճառն այն է, որ Աստված կենդանի է»:

Բրիտանիայի հանրությանն ուղղված Էնրիկեսի ուղերձը հենց այսօր Աստծուն փնտրելու կոչ էր:

Նա ավելացրել է. «Խնդրում եմ, մի սպասեք, որ տուժեք ինչ-որ դժբախտ պատահարից, որպեսզի սկսեք փնտրել Աստծուն»:

Աղբյուր՝ bible-facts.ru