Համաձայն նախագահ Սերժ Սարգսյանը 2015 թվականի ձմեռային զորակոչ անցկացնելու և զորացրում կատարելու մասին հրամանագրի՝2015 թվականի նոյեմբեր – 2016 թվականի հունվար ամիսներին կանցկացվի Հայաստանի Հանրապետության արական սեռի այն քաղաքացիների պարտադիր զինվորական և այլընտրանքային ծառայությունների ձմեռային զորակոչը, որոնց 18 տարին լրանում է մինչև 2015 թվականի դեկտեմբերի 31-ը ներառյալ, ինչպես նաև այն քաղաքացիների, որոնց նախկինում տրված՝ պարտադիր զինվորական ծառայության զորակոչից տարկետման իրավունքը դադարել է մինչև 2015 թվականի դեկտեմբերի 31-ը ներառյալ:
2015 թվականի նոյեմբեր – 2016 թվականի հունվար ամիսներին կզորացրվեն սահմանված ժամկետում պարտադիր զինվորական և այլընտրանքային ծառայություն անցած զինծառայողները։

Կառավարության որոշմամբ՝ Հայաստանի Հանրապետության կառավարությանն առընթեր ՀՀ ոստիկանության և ազգային անվտանգության ծառայության պետերին հանձնարարվում է` զորակոչից խուսափելու դեպքերը կանխելու նպատակով զորակոչի ընթացքում ուժեղացնել վերահսկողությունը, որպեսզի զորակոչային տարիքի երիտասարդները երկրից դուրս չհեռանան: <<Զորակոչից խուսափելու դեպքերը կանխելու նպատակով զորակոչի ընթացքում ուժեղացնել վերահսկողությունը ՀՀ սահմանային հաղորդակցության ուղիներում և զորակոչային տարիքի ՀՀ քաղաքացիների հանրապետությունից մեկնումը թույլատրել միայն զինվորական գրքույկներում զինվորական ծառայությունն ավարտելու կամ հիվանդության պատճառով պահեստազորում գտնվելու, իսկ ամրակցման (նախնական հաշվառման) վկայականներում` պարտադիր զինվորական ծառայության զորակոչից տարկետման իրավունքից օգտվելու մասին զինվորական կոմիսարիատների համապատասխան նշումների առկայության դեպքում>>,- նշվում է կառավարության որոշման մեջ:

Հանձնարարվում է պաշտպանության նախարար Սեյրան Օհանյանին` զորակոչից խուսափող ՀՀ քաղաքացիների վերաբերյալ նյութերն ուղարկել ոստիկանություն, իսկ զորակոչի ավարտից հետո` քննչական կոմիտեի համապատասխան կայազորային քննչական բաժիններ:

Առնվազն մեկ ամիս առաջ` մինչև զորակոչը կանխարգելիչ պատվաստումներ են արվելու: Այս նպատակով զորակոչի ենթակա քաղաքացիների ցուցակները զինվորական կոմիսարիատների կողմից ներկայացվելու են կցագրված բժշկական հաստատություններ, որտեղ արվելու են պատվաստումները: Առողջապահության նախարարին հանձնարարվել է ՊՆ հայտով զորակոչիկների ֆլյուրո (ռենտգեն) զննում, սոնոգրաֆիկ հետազոտում, ինչպես նաև կանխարգելիչ պատվաստումների կատարումը իրագործել պետական միջոցների հաշվին:

Իսկ ոստիկանությանը հանձնարարվել է ապահովել զորակոչիկների անվտանգ փոխադրումը և հասարակական կարգի պահպանումը զորակոչային տեղամասերում: Զորակոչիկներին Երևանի սահմաններից դուրս փոխադրող ավտոբուսներին ուղեկցելու համար հանրապետական հավաքակայանին կկցվի ճանապարհային ոստիկանության վեց անձնակազմ: