Հունիսի 13-ի լույս 14-ի գիշերը տեղացած հորդառատ անձրևները հեղեղեցին Վրաստանի մայրաքաղաք Թբիլիսիի փողոցները։ Տարերքի պատճառով ջրասույզ եղան անցումները, նկուղները, ջրով լցվեցին տների առաջին հարկերը, վնասվել են ճանապարհները, ենթակառուցվածքները։ Հեղեղումների հետևանքով 14 մարդ է զոհվել, 30-ը՝ տուժել և 16-ն անհետ կորել: Թբիլիսիի կենդանաբանական այգուց գիշատիչներ էինփախել` գայլեր, վագրեր, արջեր, այգու տարածքն ամբողջողովին ավերված է: Իշխանությունները խնդրել են Թբիլիսիի բնակիչներին տներում մնալ, հայտնել է ՌԻԱ Նովոստի գործակալությունը: Հունիսի 15-ը Վրաստանում սգո օր է հայտարարված:

ՀՀ նախագահ Սերժ Սարգսյանը ցավակցական հեռագիր է հղել Վրաստանի նախագահ Գիորգի Մարգվելաշվիլիին՝ Թբիլիսիում հունիսի 14-ի գիշերը, տեղի ունեցած հեղեղումների հետևանքով մարդկային զոհերի, անհետ կորածների և ավերածությունների կապակցությամբ, հայտնում է նախագահի աշխատակազմի հասարակայնության և տեղեկատվության միջոցների հետ կապերի վարչությունը:

Հանրապետության նախագահն սփոփանքի խոսքերն է հղել տուժածների և զոհվածների հարազատներին ու ընտանիքներին:

Նախնական տվյալների, ջրհեղեղի վնասները հասնում են 40 մլն լարիի` մոտ 18 մլն դոլարի: Վարչապետ Իրակլի Ղարիբաշվիլին հանձնարարել է ֆինանսների նախարարությանը տուժած յուրաքանչյուր ընտանիքի հատկացնել 10 հազար լարի` մոտ 4,5 հազար դոլար:

Զոհերի թվում երկու հայ կին կա՝ Եղիազարովա քույրերը, 15-20-ն էլ համարվում են անհետ կորած:

Երեկ կեսգիշերին ելույթ է ունեցել Թբիլիսիի կենդանաբանական այգու տնօրենը և հայտնել, որ ջրհեղեղից փախած մոտ 80 գազանի, հավանաբար, ջուրը քշել տարել է, որովհետև դրանցից շատերին քնաբեր ներարկումներ էին արել:

Ավելի ուշ հայտնի է դարձել, որ արդեն որոշում է կայացվել փոխել կենդանաբանական այգու տեղակայումը:

Հունիսի 14-ին Թբիլիսի են ուղևորվել Երևանի կենդանաբանական այգու աշխատակիցներից չորսը՝ Թբիլիսիի կենդանաբանական այգու գործընկերներին անհրաժեշտ օգնություն ցուցաբերելու նպատակով։ Օգնության խմբի ուղևորության ծախսերը հանձն է առել Վայրի բնության և մշակութային արժեքների պահպանման հիմնադրամը։ Այս մասին ասվում է Երևանի կենդանաբանական այգու ֆեյսբուքյան էջում: