Թուրքիայում հունիսի 7-ին կայանալիք խորհրդարանական ընտրություններից առաջ երկրի նախագահ Ռեջեփ Թայիփ Էրդողանի սիրելի զգեստը դարձել է պատանը։ Դրա պատճառը Եգիպտոսի նախկին նախագահ Մուհամմեդ Մուրսիի մահապատժի վճիռն է, քանի որ Մերձավոր Արեւելքում իսլամիստ նախագահի միակ համախոհը Էրդողանն էր։ Այս մասին Bild գերմանական պարբերականում հրապարակած հոդվածում գրում է թուրք սյունակագիր Էրթուղրուլ Օզքոքը։

Նախընտրական քարոզարշավի իր ելույթներում նա ինքն իրեն Մուրսիի հետ է համեմատում եւ հայտարարում, որ հայտնվել է մութ ուժերի սպառնալիքի տակ։ Էրդողանը խոսում է իր՝ նահատակ լինելու մասին. «Երբ մենք քաղաքականություն մտանք, դրանով իսկ մեզ համար պատան կարել տվեցինք»,- իր ելույթներում հայտարարում է Էրդողանը, գրում է հեղինակը։

Մուրսիին մահապատժի դատապարտելու օրը նա քննադատել էր դատավճիռը՝ ասելով, թե կախաղան են հանում ժողովրդի կողմից ձայների 52 տոկոսով արդար ընտրված նախագահին։ Զուգահեռներ անցկացնելով իր հետ՝ Էրդողանը առանց որեւէ լուրջ հիմքի հայտարարել էր, թե  «մութ ուժերը» իր մահապատիժն են ուզում, քանի որ ինքն էլ է նախագահ ընտրվել ձայների 52 տոկոսով, շարունակում է հոդվածագիրը։

Էրդողանը  հասավ նրան, որ մինչեւ անգամ հարձակվեց New York Times-ի վրա՝ թերթին մեղադրելով անամոթության եւ հանդգնության մեջ այն  պատճառով, որ թերթը անցյալ շաբաթ քննադատել էր նրան, գրում է թուրք լրագրողը եւ հարցնում. «Ի՞նչն է այդքան նյարդայնացնում Էրդողանին։ Առաջիկա խորհրդարանական ընտրություննե՞րը։ Նա պլանավորում է սահմանադրական բարեփոխումներ անցկացնել, ինչը նրան հնարավորություն կտա Պուտինի ոճով սուլթան ձեռնադրվել։ Իսկ New York Times-ն ու այլ անկախ թերթերը միայն խանգարում են նրան։ Այդ պատճառով էլ շրջելով քաղաքից քաղաք՝ նա իր ելույթներում իր կուսակցության քննադատներին անվանում է անաստվածներ, անհավատներ, վիրավորում ազատ մամուլը եւ ընդդիմադիրներին։

Էրդողանը շատ լավ հասկանում է, որ եթե քրդական «Ժողովրդական դեմոկրատական կուսակցությունը», կանխատեսումների համաձայն, հաղթահարի անցողիկ 10 տոկոսի շեմը եւ մտնի  խորհրդարան, նախագահի վախերը կիրականանան, եւ նա հավանաբար կստանա այդքան երազած սպիտակ պատանը»,- եզրափակում է հեղինակը։

news.am