Մեծ պահք, օր երեսունիններորդ

Տիրոջ ձեռքը հանգչեց ինձ վրա. բարձրացրեց ինձ Տիրոջ Հոգով, դրեց ինձ մի դաշտի մեջ, որ լի էր մարդկանց ոսկորներով։ Պտտեցրեց ինձ ոսկորների շուրջը։ Դրանք շա՜տ-շատ էին դաշտի երեսին ու սաստիկ չորացած էին։ Նա ասաց ինձ. «Մարդո՛ւ որդի, արդյոք կկենդանանա՞ն այդ ոսկորները»։ Ես ասացի. «Տե՛ր Աստված, այդ դու գիտես»։ Նա ասաց ինձ. «Մարդո՛ւ որդի, մարգարեացի՛ր այդ ոսկորների վրա և ասա՛ դրանց. «Չորացա՛ծ ոսկորներ, լսեցե՛ք Տիրոջ պատգամները։ Այսպես է ասում Տեր Աստված այդ ոսկորներիդ. ՚ Ահա ես ձեզ վրա կենդանի շունչ եմ բերելու, ձեզ ջղեր եմ տալու, ձեզ վրա միս եմ բերելու և մաշկ քաշելու, իմ հոգին եմ տալու ձեզ, և դուք կենդանանալու եք։ Եվ պիտի իմանաք, որ ես եմ Տերը»։ Ես մարգարեացա, ինչպես որ հրամայել էր ինձ Տերը։ Ու երբ մարգարեացա, մի ձայն լսեցի. հետո շարժում եղավ. և ոսկորը ոսկորի հետ մոտեցավ բոլոր հոդերին։ Տեսա, որ ջղերն ու մսերը պատում էին ոսկորները, նրանց վրա մաշկ էր ձգվում, բայց դրանց մեջ դեռ շունչ չկար։ Նա ասաց ինձ.

«Մարգարեացի՛ր, մարդո՛ւ որդի, մարգարեացի՛ր շնչի վրա եւ ասա՛ շնչին. «Այսպես է ասում Տեր Աստված. ՚ Ե՛կ, ո՛վ շունչ, չորս հողմերից, ու փչի՛ր մեռելների վրա, և նրանք կկենդանանան՚»։ Ես մարգարեացա, ինչպես որ հրամայել էր ինձ Տերը։ Ու շունչ մտավ նրանց մեջ, և կենդանացան։ Ելան կանգնեցին իրենց ոտքերի վրա. դա բազմախուռն մի ժողովուրդ էր։ Եվ Տերը խոսեց ինձ հետ ու ասաց. «Մարդո՛ւ որդի, այդ ոսկորներն Իսրայելի ամբողջ տունն են։ Դրանք ասում են. «Չորացան մեր ոսկորները, մեր հույսը կտրվեց, ու մենք մեռանք»։ Ուստի մարգարեացի՛ր ու ասա՛ դրանց. «Այսպես է ասում Տեր Աստված. ՚ Ահա ես բաց եմ անելու ձեր գերեզմանները և հանելու եմ ձեզ ձեր գերեզմաններից, ո՛վ իմ ժողովուրդ։ Տանելու եմ ձեզ Իսրայելի երկիրը։ Ու պիտի իմանաք, որ ես եմ Տերը, երբ բաց անեմ ձեր գերեզմաններն ու հանեմ ձեզ ձեր գերեզմաններից, ո՛վ իմ ժողովուրդ։ Իմ հոգին տալու եմ ձեզ, և դուք կենդանանալու եք։ Ձեզ դնելու եմ ձեր երկրում, և դուք պիտի իմանաք, որ ես եմ Տերը։ Ասացի ու կատարելու եմ՚», — ասում է Տեր Աստված։
(Եզեկիելի մարգարեություն 37:1-14)