Անզգուշությամբ մանկահասակ դստերը միջին ծանրության վնասվածք պատճառելու համար մայրը մեղավոր է ճանաչվել ՀՀ քրեական օրենսգրքի 121-րդ հոդվածի 1-ին մասով և տուգանվել 100 000 ՀՀ դրամի չափով:

Ըստ մեղադրանքի՝ կեսգիշերն անց Ստելլան, ջեռուցելու նպատակով միացրել է էլեկտրական սալիկը, իսկ մանկահասակ երեխային սենյակում թողնելով միայնակ քնած՝ գնացել աշխատանքի։ Էլեկտրական սալիկի կարճ միացման արդյունքում հարևանությամբ գտնվող բազմոցը բռնկվել է:

Դատաբժշկական փորձաքննությամբ պարզվել է, որ երեխան ստացել է դեմքի ձախ ականջախեցու, դաստակների, մարմնի ընդհանուր մակերեսի 8 տոկոս ընդգրկումով, 2-րդ, 3-րդ ԱԲ աստիճանի ջերմային այրվածքներ:

Պարզվել է, որ կինն առաջին ամուսնությունից ունեցել է 2 տղա և առողջական խնդիրների պատճառաբանությամբ խուսափել է նրանց խնամքից, երեխաների խնամքը ստանձնել են նրա ծնողները, իսկ մայրն այդ ընթացքում փաստացի ամուսնական հարաբերությունների մեջ է գտնվել մեկ այլ տղամարդու հետ եւ հղիացել, ունեցել աղջիկ երեխա:

Այս դեպքում էլ տղամարդը երեխայի գոյության մասին տեղեկանալով հեռացել է կնոջից:

Տղաները բնակվել են «Սոս մանկական գյուղ» գիշերօթիկում։ Մայրը նրանց կրկին անուշադրության է մատնել և միայն արձակուրդներին է նրանց տարել իր տուն, սակայն անգամ այդ ժամանակ դրսևորել է անփույթ և անտարբեր վերաբերմունք, նույնիսկ երեխաներին մանկահասակ դստեր հետ միայնակ, առանց որևէ մեկի հսկողության կամ խնամքի, թողել է տանը գիշերելու, իսկ ինքը գնացել աշխատանքի:

Հերթական անգամ աշխատանքի գնալիս իր հետ տարել է նաև մանկահասակ աղջկան՝ նրան տանը խնամող չունենալու պատճառով: Կինը  դստերը տարել է հացի արտադրամասից մոտ 20 մետր հեռավորության վրա գտնվող հանգստի սենյակ եւ պառկեցրել բազմոցին՝ քնեցնելու, որի անմիջական հարևանությամբ դրված է եղել էլեկտրական սալիկ:

Թողնելով 3-ամյա դստերը միայնակ՝ մայրը գնացել է աշխատանքի:Այդ ընթացքում փոքրիկն արթնացել է և ցանկացել հոգալ բնական կարիքները: Այդ նպատակով գնացել է դեպի սենյակի անկյունում դրված տարան, սակայն զուգագուլպան փաթաթվել է ոտքին, որի հետևանքով ընկել է էլեկտրական սալիկի վրա՝ այրելով ձեռքերը և դեմքը։ Ապա հանել է այրված զուգագուլպան, նետել բազմոցին, որն էլ անմիջապես բռնկվել է: Փոքրիկը տեղափոխվել է հիվանդանոց և ստացել ստացիոնար բուժօգնություն:

Այս ամենից հետո էլ կինն անհրաժեշտ հետևություն չի կատարել։ Շարունակելով անտարբեր վերաբերմունքը երեխայի նկատմամբ՝ ննջասենյակում միացրել է հեռուստացույցը, որպեսզի դուստրը մուլտֆիլմ դիտի, իսկ ինքը՝ քնել։ Փոքրիկն էլ անկողնու գլխամասի հարևանությամբ գտնվող էլեկտրական վարդակը քաշելով դուրս է հանել, որի ժամանակ էլ հոսանքահարվել է և մահացել:

Մինչև դատաքննության սկսվելը՝ տուժողի իրավահաջորդի ներկայացուցիչը հայտարարել է, որ ամբաստանյալից քաղհայցի պահանջ չունի, բողոք չունի և խնդրել է նրա վերաբերյալ քրեական գործի վարույթը կարճել և նրա նկատմամբ քրեական հետապնդում չիրականացնել:

Դատաքննության ընթացքում ամբաստանյալն առաջադրված մեղադրանքում իրեն մեղավոր է ճանաչել՝ հայտարարելով, որ զղջում է կատարվածի համար և միջնորդել գործը քննել արագացված ընթացակարգով:

Դատարանն ամբաստանյալի պատասխանատվությունը և պատիժը մեղմացնող հանգամանքներ է դիտել այն, որ ընդունել է մեղքը, զղջացել կատարվածի համար, նախաքննությամբ տվել է ինքնախոստովանական ցուցմունք, աջակցել է նախաքննության մարմնին՝ իր իսկ կողմից կատարված հանցագործության բացահայտման գործում, կին է, ըստ իր հայտարարության՝ ֆիզիկապես վատառողջ է, չի աշխատում և գտնվում է սոցիալապես անապահով վիճակում: