Նախագահական  նստավայրի մոտ «Մանանա Գրեյն» ընկերության փոխտնօրենի մեքենայից 56 մլն դրամի գողությանն աջակցելու համար 5.6 տարվա ազատազրկման դատապարտված, HSBC բանկի նախկին աշխատակից Աշոտ Առուշանյանին արդարացնելու պահանջով արդեն 15-րդ օրը հացադուլ անող Առուշանյաններն այսօր՝ փետրվարի 3-ին,  դադարեցրել են հացադուլը և իրենց բողոքի ակցիան շարունակելու են նստացույցով: Այս մասին ասել է, Աշոտ Առուշանյանի հայրը՝ Լավրենտի Առուշանյանը:

«Մենք քիչ առաջ նամակ ենք ուղարկել նախագահականի նամակների բաժին և տեղեկացրել ենք, որ մենք այսօրվանից դադարեցնում ենք հացադուլը և շարունակում ենք բողոքել նստացույցով: Մենք նաև գրել ենք, որ համաձայն չենք, որ նախագահը Վճռաբեկ դատարանի վճռից հետո մեզ ընդունի: Մենք պահանջում և խնդրում ենք, որ նախագահը մինչև Վճռաբեկի որոշումը ընդունի մեզ, որովհետև մենք վստահ ենք, որ նախագահը ամբողջ տեղեկատվությանը չի տիրապետում»,-ասաց նա:

Նրա խոսքով՝ գիշերը վատացել է իր կնոջ՝ Անահիտ Առուշանյանի ինքնազգացողությունը, նրան տեղափոխել են հիվանդանոց, այնուհետև տուն:

Լավրենտի Առուշանյանը նշեց, որ եթե նստացույցն էլ արդյունք չտա, իրենք շարունակելու են իրենց բողոքի ակցիաները, նույնիսկ դիմելու են ծայրահեղ միջոցների:

Նշենք, որ հունվարի 31-ին նախագահ Սերժ Սարգսյանը Սիրահարների այգում զրուցել էր Անահիտ Առուշանյանի հետ և խոստացել նրանց ընդունել Վճռաբեկ դատարանի որոշումից հետո:

news.am