Դեպի Արցախ ուխտագնացության շրջանակներում, որը կազմակերպել է Մայր Աթոռ Սուրբ Էջմիածինը՝ Վեհափառ Հայրապետի օրհնությամբ և Հայաստանյան «World Vision» կազմակերպության աջակցությամբ, Մայր Աթոռի և ԼՂՀ ԶՈՒ ծառայող սարկավագ հոգևորականներ, բանաստեղծ Խաչիկ Մանուկյանը և շուրջ 20 լրագրողներ հանդիպում ունեցան ԼՂՀ  Ազգային ժողովի նախագահ Աշոտ Ղուլյանի հետ:

Խոսելով ղարաբաղա-ադրբեջանական շփման գծում վերջերս տիրող լարվածության մասին, Աշոտ Ղուլյանն ընդգծեց. «Ես չգիտեմ, թե ինչքան է շարունակվելու այս իրավիճակը, որ մենք երկու հայկական հանրապետություններ ունենք, բայց ինչքան էլ շարունակվելու լինի, մենք պետք է կարողանանք մեր մեջ ուժ գտնել, հնարավորություններ ստեղծել և միշտ  զգանք, որ մենք կարևոր առաքելություն ունենք»:

Ինչ վերաբերում է Արցախի վերաբնակեցման գործընթացին, ապա, ԼՂՀ  Ազգային ժողովի նախագահի խոսքով, այն շարունակական բնույթ է կրում.

«Մշտապես ունենալով Արցախի ժողովրդագրական զարգացման ծրագիրը՝ մենք հետևողականորեն պետք  է աշխատենք Արցախի շրջաններում վերաբնակեցման ծրագիր իրականացնելու ուղղությամբ: Պարզապես պետք է ընդունենք, որ վերաբնակեցում ինքն իրեն կամ համպատրաստից չի լինում: Մեր ցանկությունն է միանգամից մի քանի հազար մարդկանց վերաբնակեցում կազմակերպել Արցախում, բայց տնտեսական, ֆինանսական հնարավորությունները մեծ չեն, որ մենք այդպիսի մեծ ծավալներով կարողանանաք իրականացնել: Վերաբնակեցմանը զուգահեռ մենք պետք է կարողանանք ծայրամասային գյուղերի խնդիրները լուծել»:

Այն հարցին, թե Արցախում եզդիների վերաբնակեցման շուրջ ի՞նչ տեսակետներ կան, և արդյո՞ք հնարավոր է Արցախում դեմոգրաֆիկ պատկեր փոխվի, Աշոտ Ղուլյանը պատասխանեց. «Պետք է աշխատել այդ ուղղությամբ առանց երկար բարակ խոսելու: Ղարաբաղի իշխանությունները չեն բացառել այդպիսի հնարավորություն, և ես չեմ կարծում, որ դա լինելու է այնպիսի ծավալներով, որը կարող է ազդել, բայց նման հարցերում ավելի ճիշտն աշխատելն է»:

Ըստ նրա, դա շատ ավելի մարդկային խնդիր է, քան դրա տակ քաղաքական կամ դիվանագիտական բան որոնելը. «Պետք չէ դիվանագիտական արդյունքների հետևից ընկնել, այլ հանգիստ, մեր հնարավորությունների սահմաններում աշխատել»,-գտնում է Աշոտ Ղուլյանը:

Նրա խոսքով, Արցախում վերջին տարիների համեմատ բնակչության թիվը ոչ շատ աճել է, ոչ էլ նվազել: «Ես չեմ կարող ասել, որ արտագաղթ չկա, բայց դա այն ծավալի չէ, որը մտահոգի»:

Այն հարցին, թե Արցախում ճանապարհների կառուցման և նորոգման շուրջ ի՞նչ աշխատանքներ են տարվում, Աշոտ Ղուլյանը տեղեկացրեց, որ առաջիկա երկու տարիներին շատ լուրջ օժանդակություն է լինելու Վարդենիս-Մարտակերտ ճանապարհի կառուցման համար:

«Կարծում եմ, այդ տարածքում բոլոր գյուղերն էլ կապված են այդ մայրուղուն, հետևաբար այն շատ մեծ ենթակառուցվածքների խնդիր է լուծելու: Մենք մինչև 2015 թվականը ենթակառուցվածքային առումով շատ ավելի զարգացած համակարգ ենք ունենալու Արցախում, բայց դրանով չպետք է ավարտած համարել մեր աշխատանքը, այս տարիների համար ծրագրվում է նաև Հայաստանը Արցախին կապող մեծ էներգոհամակարգի հիմնումը»,-տեղեկացրեց նա:

Անդրադառնալով արցախցի գործարար, բարերար Լևոն Հայրապետյանի ձերբակալությանը, ԼՂՀ ԱԺ նախագահը կարծիք հայտնեց, որ այն, ինչ տեղի է ունեցել նրա հետ, ամենայն հավանականությամբ, թյուրիմացություն է

«Ղարաբաղից արդեն տարբեր ձևաչափերով այդպիսի հայտարարություններ եղել են ոչ թե ի պաշտպանություն Լևոն Հայրապետյանի, քանի որ կարծում եմ, որ նա պաշտպանության կարիք չունի, տվյալ դեպքում մեզ համար կարևոր է, որ նրա առողջական խնդիրներ ունի: Լինելով ազատության մեջ՝ Լևոն Հայրապետյանը շատ ավելի օգտակար կլինի նույն այդ գործերի հետաքննությունը տանելու առումով»:

Աշոտ Ղուլյանը հույս հայտնեց, որ Լևոն Հայրապետյանը շուտով ազատության մեջ կլինի ու կշարունակի իր բարեգործական և բոլոր կարգի գործերն ի օգուտ Արցախի: