Արևմտյան քաղաքական վերնախավը և համաշխարհային ԶԼՄ-ները Իրաքում ստեղծված իրավիճակի համար քավության նոխազ են փնտրում «հազար ու մի գիշերների» քաղաք Բաղդադում, որտեղ որպես այդպիսին ներկայացվում է երկրի վարչապետ Նուրի ալ-Մալիքին:

Եթե մի կողմ թողնենք Իրաքի ներկայիս վարչապետի դեմ հիմնականում քարոզչական բնույթի լրատվամիջոցային արշավը, ապա իրականում ակնհայտ է, որ Իրաքի քաղաքական գոյության հիմքերը խարխլողն ամենևին էլ այդ երկրի ներկայիս վարչապետը չէ:

Մարդկային քաղաքակրթության բնօրրաններից Տիգրիսի և Եփրատի միջագետքում ծայրահեղ իսլամականների այժմյան անկառավարելի քաոսը ծայր է առել ոչ թե ալ-Մալիքիի շնորհիվ, այլ շինծու պատրվակով Իրաք արտաքին զինված ներխուժման հետևանքով, իսկ հետագայում խորացել հարևան Սիրիայում իսլամական ահաբեկիչների գործողություններին արևմտյան գաղտնի օժանդակության և սաուդական, կատարյան ու թուրքական համարյա բացահայտ աջակցության պայմաններում:

Մեղադրանքները, թե Իրաքի շիա վարչապետը ձևավորել է բացառապես շիայական կառավարող վերնախավ և որոշակի խտրական քաղաքականություն վարել սուննիական ու քրդական փոքրամասնությունների հանդեպ, թեև հիմնավոր են, սակայն Իրաքի պարագայում ժամանակակից և պատմական իրակույթներին ծանոթ չլինելու արդյունք, ինչից էլ բխում է այն ակնհայտ մոլորությունը, թե իբր սուննիական, քրդական և շիայական լայն ինքնավարություներով համադաշնային Իրաքն այս երկիրը ամբողջական պահելու միակ ճանապարհն է:

Միջագետքում «Շվեյցարիա» ստեղծելու ծրագիրն իրականում ավելին չէ, քան հերթական պատրանքը, իսկ նման ուղին՝ երկիրը մասնատելու առաջին քայլը , քանի որ «միջագետքյան ամբողջականությունը» մշտապես հիմնված է եղել էթնիկ կամ դավանական մի խմբի կողմից ուժեղ կենտրոնական իշխանության ստեղծման վրա, որը նաև «բիրտ ձգողականությամբ» ճնշող մագնիսի նման իր շուրջն է հավաքել կենտրոնախույս հատվածները:

Այս առումով Նուրի ալ-Մալիքի ամենակարևոր սխալը ոչ թե շիայական կառավարող վերնախավի ստեղծումն էր և խտրական քաղաքականությունը մյուս էթնիկ-դավանական խմբերի հանդեպ, ինչը փաստորեն «նորմալ» է Իրաքի պարագայում,, այլ այդ նոր վերնախավի նաև բիրտ ուժի կիրառմամբ գերակա դիրքեր զբաղեցնելու և կենտրոնախույս ձգտումները ճնշելու անկարողությունը, ինչը մինչ այդ հաջողվել էր անել սուննիներին՝ Սադդամ Հուսեյնի իշխանության ողջ ընթացքում:

Վարդան Ոսկանյանի ֆեյսբուքյան էջից