Արսեն Խոջոյանը գտնվում է բժիշկների ուշադրության կենտրոնում, եթե խնդիր ծագի իր առողջության վատթարացման հետ կապված, անմիջապես արձագանքելու ենք. այս մասին այսօր խորհրդարանում լրագրողների հետ ճեպազրույցում ասել է Առողջապահության նախարար Արմեն Մուրադյանը:

Այն հարցին, թե արդյոք հետազոտե՞լ են, ստուգե՞լ են՝ Արսենին գերության ընթացքում դիզվառելիք ներարկել են, թե ոչ, նախարարը պատասխանել է, թե նախարարությունը չի կարող փորձագիտական աշխատանք կատարել և դա համապատասխան դատաբժշկական փորձաքննությամբ է հնարավոր պարզել։

«Նախարարությունը կարող է թե՛ այդ հիվանդի մոտ ուղղորդել բժշկական անձնակազմ, և թե՛ նպաստել, որ այդ մարդուն տեղափոխեն բուժհիմնարկ: Ինչ վերաբերում է դիզվառելիք ներարկելուն, կարծում եմ, որ համապատասխան դատաբժշկական փորձաքննություն պետք է արվի՝ համապատասխան իրավապահ մարմինների հարցումի պարագայում, եթե այդ անձն ինքը դիմի դատաբժշկական փորձաքննության համար»,-նշել է Արմեն Մուրադյանը:

Վերջինիս զարմացրել է այն, որ Խոջոյանի հարազատները դժգոհ են բուժսպասարկումից և ասում են, որ դեղորայքի գումար չունեն:

Նախարարի խոսքով, Արսենը գտնվում է բժիշկների ու նախարարության բուժվարչության ուշադրության կենտրոնում:

«Այդ անձի ամբողջ բժշկական ախտորոշումից սկսած մինչև բուժօգնությունը և փորձաքննությունը մենք պատրաստ ենք իրականացնել: Նա պետք է դիմի»,- ընդգծել է Արմեն Մուրադյանը: