Գավառ քաղաքի Հացառատ թաղամասի բնակիչներն այսօր հավաքվել էին Կառավարության շենքի դիմաց՝ իրենց բողոքն արտահայտելու գյուղի խնդիրների մասին:

«Հայկական Վարկածը» զրուցեց գյուղի բնակիչ Դմիտրի Իսպիրյանի հետ:

Նրա փոխանցմամբ՝ Հացառատը ժամանակին բավականին հարուստ գյուղ է եղել, որն ունեցել է  մոտ 12000 բնակիչ և 2800 տնտեսություն: Գյուղացին ցավով նշում է, որ այսօր այդ ամենից գրեթե ոչինչ չի մնացել:

«Ճանապարհները քարուքանդ են, մանկապարտեզում ու դպրոցում երեխաները չունեն խաղալիքներ, խաղում են կոլայի և ֆանտայի փականներով»,- պատմեց նա:

Գյուղացու խոսքերով,Հացառատը նաև ջրառատ է եղել, բայց այսօր ջուր էլ չկա:

«Մանկապարտեզը գտնվում է սանիտարահիգիենիկ անմխիթար վիճակում, ջրագիծը և կոյուղին ճանապարհից հեռու է 7-10 մետր: Ոչինչ  չի արվում այս խնդիրները լուծելու համար»,-նշեց Իսպիրյանը:

Գյուղի բնակիչները բազմիցս նամակներ են ուղղել նախագահին, վարչապետին, ինչպես նաև ԱԺ նախագահին: Իսպիրյանի հաղորդմամբ~ նամակ են ստացել մարզպետարանից, որտեղ նշված է եղել, որ իրենց գյուղին արդեն իսկ հատկացրել են 326 մլն դրամ. «Նշված է եղել, որ 226 միլիոն դրամ ծախսել են Սահակաշեն գյուղ տանող ճանապարհի ասֆալտապատման վրա,սակայն նման բան չի եղել: Մենք ուզում ենք, որ գան, տեսնեն իրենց աչքով և լուծեն այս խնդիրները»:

Նա տեղեկացրեց, որ այսօր կառավարության ներկայացուցիչը խոստացել է, որ կգան՝ տեղում տեսնելու իրավիճակը:

«Տեսնենք՝ որքանով ազնիվ կգտնվեն»,-ասաց Հացառատի բնակիչը:

Մարիանա Պետրոսյան