Մայիսի 5-ը հաշմանդամների իրավունքների համար պայքարի միջազգային օրն է:

Եվրոպայում մայիսի հինգը նշվում է որպես Անկախ կյանքի եվրոպական օր. այս մասին այսօր լրագրողների հետ զրույցում հայտնեց «Ունիսոն ՀԿ» գործադիր տնօրեն Արմեն Ալավերդյանը և հավելեց, որ այս տարի Եվրոպայում օրը նշվում է «Ոչ հաշմանդամների ծրագրերի կրճատմանը» կարգախոսով:

Անդրադառնալով աշխատավարձի մասնակի փախհատուցման ծրագրին, համաձայն որի՝ առաջին և երկրորդ կարգի հաշմանդամներին երկու տարով է տրամադրվում աշխատանք, բանախոսը նշեց, որ հունվարից զբաղվածության մասին նոր օրենքը մտել է ուժի մեջ, և 2 տարի աշխատանքային պայմանագիրը դարձել է ընդամենը 6 ամիս:

«Այդ ցանցի մեջ նույնիսկ հաշմանդամ բառը չկա, քանի որ մենք քարոզում ենք իրավահավասարություն և ուզում ենք, որ անձը չզգա իր վիճակի ծանրությունը: Սակայն դեռևս դա բավականին դժվար է, և պետության, և հասարակության կողմից դժվար ընկալելի: Երկու տարվա մեջ մարդը ձեռք է բերում աշխատանքային հմտություններ և դառնում է մրցունակ, և այլ գործատուներ նույնպես կարող են աշխատանք տալ տվյալ անձին: Դա հնարավոր չէ ապահովել 6 ամսվա ընթացքում»,-նշեց Արմեն Ալավերդյանը:

«Ունիսոն ՀԿ» հանրային կապերի ղեկավար Մարիաննա Չալիկյանն էլ ավելացրեց, որ հնում հաշմանդամների բոլոր խմբերը մտնում էին փոխհատուցման ծրագրերի մեջ, սակայն այժմ միայն առաջին խմբի հաշմանդամներն են օգտվում այդ ծրագրի ընձեռած հնարավորություններից:

«Ստեղծվել է մի ծրագիր, որը օգնական է տրամադրում այն հաշմանդամներին, ովքեր նման ծառայության կարիք ունեն, բայց եթե արտասահմանում տալիս են անժամկետ, մեզ մոտ՝ 6 ամսով է. ի՞նչ է 6 ամիս հետո, հաշմանդամն այլևս օգնականի կարիք չի՞ ունենա»,-ընդգծեց Մարիաննա Չալիկյանը:

Արմեն Ալավերդյանը նշեց նաև, որ չնայած փողոցներում կառուցել են հատուկ թեքահարթակներ հաշմանդամների համար, այնուհանդերձ, հասարակական տրանսպորտը Հայաստանում հասանելի չէ հաշմանդամություն ունեցող մարդկանց համար։

Մարիանա Պետրոսյան