Զարմանալ միայն կարելի է, որ աւելի քան քսան տարուան անկախութիւնը կարծէք ոչինչ տուաւ մեզի՝ ներսի եւ դուրսի հայութեան….Մենք էապէս չկրցանք ԱՆԿԱԽ դառնալ՝ միտքով, սրտով, հոգիով եւ ոգիով, ՀԱՅԿԱԿԱՆՈՒԹԵԱՄԲ….Իշխող վերնախաւը անկախութիւնը արժեւորեց որպէս՝ երկիրը անխնայ կեղեքելու եւ անաշխատ հարստութիւն դիզելու հնարաւորութիւն: Մնացեալին մեծ մասը՝ որպէս հայրենիքէն փախուստ տալու եւ անոր խնդիրներէն խոյս տալու առիթ: Արտերկրի հայութիւնը, յոյսը դնելով անկախ ու ազատ Հայաստանին վրայ, տակաւ կորսնցուց՝ հայապահպանման եւ հայակերտման ուղղուած իր պայքարի թափը, նոյնիսկ Պահանջատիրութեան….Եւ այսպէս ԱՆԿԱԽՈՒԹԻՒՆԸ դարձաւ տեսակ մը հմայիլ, որ կը կախարդէ, կը շլացնէ իր խաբեպատիր հմայքով….ի վերջոյ մեզ հասցնելու հոն, ուր որ ենք….ԻՆՔՆԱՃԱՆԱՉՄԱՆ ԵՒ ՍԹԱՓՈՒՄԻ ԺԱՄՆ Է….

***

Մեր յոյսն ու լոյսը՝ մեր երիտասարդութիւնն է, որ զերծ է անցեալի կարծրատիպերու ծանր բեռէն, կաշկանդումներէն….,որ կրնայ ազատ ու բաց մտքով մտածել…, որ կրնայ խօսքը գործի վերածելու համարձակութիւնն ու վճռակամութիւնը ունենալ…., որ ունի ԻՏԷԱԼ, ՏԵՍԼԱԿԱՆ, որմէ շատ-շատեր կը հրաժարին տարիներու թաւալումով եւ կը կծկուին կրաւորականութեան եւ մտային ու հոգեկան ծուլութեան պատեանին մէջ….Երիտասարդութիւնն է որ պիտի փշրէ ա՛լ հնացած, կոշկոռ կապած թապուները, պիտի ընդվզի ամէն տեսակի անարդարութեանց եւ ստրկացումներուն դէմ….եւ իր ՈԳԻԻ ԽՈՅԱՑՈՒՄՈՎ պիտի յաղթահարէ մեզ ազգովին ճորտացնող պատնէշները բոլոր….

Երան Կույումջյանի  ֆեյսբուքյան էջից