Միջազգային հանրությունը լրջորեն անհանգստացած է ղարաբաղյան պատերազմի վերսկսման վտանգով:

Այդ մտավախությունն ամրապնդվում է այն հանգամանքով, որ, մասնավորապես, Ռուսաստանն ակտիվորեն միլիտարիզացնում է տարածաշրջանը:

Մոսկվան, մի կողմից` ուժեղացնում է Հայաստանում գտնվող իր ռազմաբազան, մյուս կողմից` մեկ միլիարդի զենք-զինամաթերք է վաճառում Ադրբեջանին:

Այնպիսի տպավորություն է, որ Կրեմլը նախապատրաստում է տարածաշրջանային պատերազմ:

Պատերազմի վերսկսման լուրջ պատճառ են նաև երկու երկրներում հաստատված ռեժիմները:

Ավտորիտար իշխանությունները հաճախ են դիմում ավանտյուրաների` երկրի ներսում սեփական ձախողումները քողարկելու, արդարացնելու համար: Այս պնդումը հատկապես արդարացված է Ադրբեջանի իշխանության մասով:

Այս համատեքստում` ԵԱՀԿ Մինսկի խմբի համանախագահությունն առավելապես իր ջանքերը կենտրոնացրել է` ոչ թե կարգավորման կոնկրետ լուծում գտնելու, այլ պատերազմի վերսկսումը կանխելու համար:

Վիեննայում, միջնորդների ներկայությամբ, հուլիսի 12-ին, հանդիպել են, Հայաստանի և Ադրբեջանի արտգործնախարարները:

Ամփոփելով հանդիպումը` միջնորդները հանդես են եկել հայտարարությամբ, որում մասնավորապես ասված է. «…Համանախագահները և արտգործնախարարները շարունակել են հակամարտության խաղաղ կարգավորման վերաբերյալ քննարկումները՝ հիմնական ուշադրությունը կենտրոնացնելով կողմերի միջև լարվածությունը թուլացնելու ուղղությամբ ջանքերը շարունակելու և այս տարի երկու երկրների նախագահների միջև հանդիպում կազմակերպելու հարցի վրա: Հուլիսի 12-ին կայացած համատեղ հանդիպման ժամանակ էլ երկու երկրների արտգործնախարարները վերահաստատել են վերոհիշյալ նպատակներն իրականացնելու ուղղությամբ քայլեր ձեռնարկելու իրենց հանձնառությունը և քննարկել են առաջիկա ամիսներին բանակցություններ անցկացնելու ծրագրերը: Համանախագահներն այսօր ԵԱՀԿ Մինսկի խմբի անդամ երկրների դեսպաններին տեղեկացրել են հանդիպումների արդյունքների մասին»:

Եթե ուշադրություն դարձրեցիք, հայտարարության տեքստում բացակայում են նախադասություններ, ձևակերպումներ, որոնք թեկուզև ընդհանուր գծերով կանդրադառնային կարգավորման էությանը:

Փոխարենը` շեշտը դրվում է Հայաստանի ու Ադրբեջանի նախագահների հանդիպման կազմակերպման անհրաժեշտության վրա:

Ըստ ամենայնի, այս փուլում, միջնորդները խիստ հավանական են համարում պատերազմի վերսկսման վտանգը և իրենց հիմնական առաքելությունը համարում են այդ վտանգի չեզոքացումը՝ այդ համատեքստում էլ կարևորելով Սարգսյան-Ալիև հանդիպումը:

Սուրեն Սուրենյանց