Այսօր Սյունիքն ընդունում է իր նոր, թվով հինգերորդ մարզպետին:

Կարող է արդյո՞ք Վահե Հակոբյանը դառնալ լավ մարզպետ, ցույց կտա ժամանակը:

Սյունիքի մարզպետներ են եղել կյանքի փորձով իմաստնացած քաղաքական ու ծառայողական կյանքի բովով անցած անհատականություններ, որոնք այս կամ այն չափով ազդել են մարզի տնտեսական-քաղաքական կյանքի վրա:

Սյունիքի նախկին մարզպետ Սուրիկ Խաչատրյանից հետո, ինչպես էլ հարցին մոտենաս, անկասկած դժվար է լինելու: Սպասելիքները շատ են լինելու,  քանի որ հայոց արևելաց կողմից հզոր միջնաբերդ հանդիսացող Սյունիքը նաև կարիք ունի զարգացման ու հզորացման:

Վերջին 200 տարվա իրադարձությունները ցույց են տալիս, որ այս մարզի կարևորությունը պատմական հրամայական է:

Սյունեցիները մեծ սպասելիքներ ունեն Վահե Հակոբյանից, որովհետև ճանաչում և խորապես հարգում են նրա հորն ու ընտանիքին, հավատում են նրա քաղաքական փորձառությանը, անձնական բարոյականությանը ու անհատական նկրտումներին: Եթե նա կարողանա օրենքով իրեն վերապահված իշխանությանը հավելել մարդասիրությունն ու աշխատասիրությունը, Սյունիքը կունենա արժանավոր մարզպետ:

Ինչ խոսք, դժվար է լինելու, սակայն, եթե նորանշանակ մարզպետը կարողանա համախմբել ողջ մարզի կարող ստեղծագործ ուժերին, հավատ ներշնչի իր անձի նկատմամբ և ցույց տա, որ ինքը ոչ միայն Մաքսիմ Հակոբյանի որդին է, այլև Վահե Հակոբյանը, Սյունիքը վերջապես շունչ կքաշի:

Ինչպես ասում են՝ ժամանակը ցույց կտա…

Վոլոդյա Հովհաննիսյան