Մեր կայքի անցկացրած հարցումը վկայում է, որ գազի գնի թանկացումը հասարակության տրամադրությունների վրա էական բացասական ազդեցություն է ունեցել:

Համենայն դեպս, մեր հարցման մասնակիցների 97%-ը կարծում է, որ գազի գնի թանկացումը արտագաղթի նոր ալիք է բերելու:

Առհասարակ, փորձը ցույց է տալիս, որ հասարակությունն իր դժգոհությունն արտահայտում է մի քանի ճանապարհով:

Քաղաքակիրթ երկրներում՝ երբ իշխանությունը չի արդարացնում ընտրողների ակնկալիքները, տեղի են ունենում արտահերթ ընտրություններ, կամ՝ հերթական ընտրությունները հանգեցնում են իշխանափոխության:

Երբեմն հասարակության դժգոհությունը հանգեցնում է հուզումների:

Օրինակ, Ղրղզստանի ոսկու ամենամեծ հանքի աշխատողները դժգոհ են իրենց պայմաններից, պահանջում են ազգայնացում: Հուզումները հանքահորում այնպիսի ծավալ են ընդունել, որ երկրի այդ հատվածում հայտարարվել է արտակարգ դրություն: Այս երկրի իշխանությունները լրջորեն վախենում են, որ իրենց մոտ ստեղծվել են սոցիալական հեղափոխության նախադրյալներ:

Թուրքիայի կառավարությունն որոշել է Ստամբուլի այգիներից մեկը վերակառուցել: Այս փաստը հարուցել է այդ երկրի հասարակության զայրույթն ու արդեն մեկ շաբաթ է՝ թուրքական Անկարա, Ստամբուլ, Բոդրում և Իզմիր քաղաքաները դարձել են հեղափոխական պայքարի օջախներ:

Հայաստանի հասարակությունը դժգոհում է, սակայն մեզանում դա արտահայտվում է ոչ թե փողոցներում, այլ սոցիալական ցանցերում:

Մեր քաղաքացիները, բառիս բուն իմաստով, թալանվում են, սակայն յուրքանչյուրը մտածում է սեփական հարցերը յուրովի լուծելու մասին. պայքարի հավաքական կամք չի ձևավորվում:

Հիմնականում՝ դժգոհ զանգվածը բռնում է արտագաղթի ճանապարհը՝ իր մերժողական վերաբերմունքը ցույց տալով իշխանությանը, նրա վարած քաղաքականությանը:

Եթե այսպես շարունակվի, շուտով Հայաստանում կմնա այնքան քիչ բնակաչություն, որով հնարավոր չի լինի երկրում որակական փոփոխություններ առաջացնել:

 Սուրեն Սուրենյանց