Ըստ ԶԼՄ-ների, Պետեկամուտների կոմիտեի նախագահ Գագիկ Խաչատրյանին է պատկանում ՀԴՄ կտրոնների թուղթ մատակարարող «Ալեքսերվ» ընկերությունը, որը, հաղթելով այդ ապրանքի մատակարարման մրցույթում, այս տարվա ապրիլ ամսին «Գնումների աջակցման կենտրոն» ՊՈԱԿ-ի հետ կնքել է շրջանակային պայմանագիր:

Բացի այդ, ըստ նույն աղբյուրների, ՊԵԿ նախագահի անվան հետ են կապվում նաև այլ ընկերություններ, ինչպես օրինակ, ««Ապեյրոն» ՍՊԸ-ն (սննդամթերքի ներկրում), «Մեգաֆուդ» ՍՊԸ-ն (սննդամթերքի ներկրում և արտադրություն), «Գալաքսի» սուպերմարկետը, «Մեգա մոթորս» ՍՊԸ-ն («Միցուբիշիի» ներկայացուցիչը ՀՀ-ում), «Սանտա ֆե» սրճարանը, «Գալաքսի» հացի գործարանը, «Մեգա սպորտ» խանութների ցանցը, «Խրոնոգրաֆ» թանկարժեք ժամացույցների խանութ-սրահը, «Չիմեգ» ՍՊԸ-ն, «Յուքոմ» ընկերությունը (արբանյակային հեռարձակում, ֆիքսված հեռախոսակապ, ինտերնետ), «Ամասիայի» կաթի գործարանը, «Ալյանս» մաքսային տերմինալը և այլն:

Այս փաստերը հիմք են հանդիսացել, որպեսզի «Թրանսփարենսի Ինթերնեշնլ» հակակոռուպցիոն կենտրոնը Խաչատրյանի հարցով դիմի Բարձրաստիճան պաշտոնատար անձանց էթիկայի հանձնաժողովին:

Հանձնաժողովը դիմումը քննել է, հաստատել է, որ, մասնավորապես, «Ապեյրոն» և «Մեգամոթորս» ընկերությունները պատկանում են հենց ՊԵԿ-ի նախագահի որդիներին, ևս չորս ընկերությունների սեփականատերեր Խաչատրյանի ազգականներ են: Հայաստանում, ի դեպ, ընդունված է, որ բարձրաստիճան պաշտոնյաներն իրենց բիզնեսները ձևակերպում են երեխաների, հարազատների անուններով ու հաստատապես` Խաչատրյանը բացառություն լինել չի կարող: Հետևաբար` կարելի է պնդել, որ հենց ՊԵԿ-ի նախագահն է թվարկված և էլի բազմաթիվ բիզնսների իրական տերը: Վախենամ, որ նա ոչ թե սոսկ խոշոր գործարար է, այլ մարդ, որը հավակնում է օլիգարխ կոչվելուն:

Այս համատեքստում առավել քան զավեշտալի է, որ նշված փաստերի ուսումնասիրությունը հիմք չի տվել Բարձրաստիճան պաշտոնատար անձանց էթիկայի հանձնաժողովին եզրակացնելու, որ Պետեկամուտների կոմիտեի նախագահ Գագիկ Խաչատրյանը «Ապեյրոն» և «Մեգամոթորս» ընկերությունների առնչությամբ գտնվել է շահերի բախման իրավիճակում: Հանձնաժողովը փաստել է, որ «ինչպես հանձնաժողովին ներկայացված դիմումներում, այնպես էլ հանձնաժողովի ուսումնասիրությունների արդյունքում ի հայտ չեն եկել փաստեր, որ ՊԵԿ նախագահ Գագիկ Խաչատրյանը իր լիազորությունների շրջանակում կատարել է այնպիսի գործողություն կամ ընդունել է այնպիսի որոշում, որը ինքնին օրինական լինելով հանգեցրել է  կամ նպաստել «Ապեյրոն» և «Մեգամոթորս» ընկերությունների գույքային կամ իրավական դրության բարելավմանը»:

Մի կողմից` հանձնաժողովը, կարծես թե, ընդունում է, որ Խաչատրյանի ընտանիքը տիրապետում է լուրջ բիզնեսների, մյուս կողմից` փաստվում է, որ նրա այսօրվա պաշտոնական դիրքը չի նպաստել այդ բիզնեսների համար արտոնյալ պայմանների ստեղծմանը:

Համաձայնեք` զավեշտալի իրավիճակ է, զարմանալի որոշում, որը, հավանաբար, օրենքի խախտմամբ, սահմանված ժամկետներում չի հրապարակվել` հենց այս պատճառով:

Երբ Երևանի ոստիկանապետ Ներսիկ Նազարյանը պաշտոնակ արվեց` պետական ծառայության և բիզնեսի անհամատեղելիության հիմքով, շատերը, այդ թվում` ես, հույս հայտնեցինք, որ Հայաստանում սկսվել է իշխանությունն օլիգարխիայից տարանջատելու գործընթաց:

Փաստորեն, մեր ոգևորությունն ադեկվատ չէր, շտապել ենք:

Ստացվում է` բիզնեսի և պաշտոնի անհամատեղելիության մասին հիշում են, երբ խնդիր է դրված ազատվել կոնկրետ մարդուց:

Խաչատրյանի պարագայում` բիզնեսի և պաշտոնի անհամատեղելիության մասին հիշող չեղավ, այն էլ` այն դեպքում, որ հենց ՊԵԿ-ի նախագահն է այս կամ այն բիզնեսի համար արտոնություններ ստեղծողը, խոչընդոտներ հարուցողը:

Դե արի ու հավատա արդարությանը…

 Սուրեն Սուրենյանց