Այսօր «Վարկած» ակումբում քաղաքագետ Արկադի Վարդանյանը բացահայտեց, թե ինչու է հիասթափված Րաֆֆի Հովհաննիսյանից և նրա ղեկավարած շարժումից:

«Այդ շարժման նկատմամբ իմ հիասթափությունը սկիզբ առավ ան ժամանակ, երբ Րաֆֆի Հովհաննիսյանը գնաց Գագիկ Ծառուկյանի հետ հանդիպման, ու դա անարդյունք ավարտվեց: Ես Րաֆֆի Հովհաննիսյանի խորհրդատուներից չէի, մենք պարզապես հանդիպում, խոսում էինք, բայց նա իմ խորհուրդներից ոչ մեկը հաշվի չառավ ու գնաց այդ հանդիպմանը, իսկ ինձ համար վաղուց շատ պարզ էր, որ այս իշխանությունը ոչ մի փոփոխություն չէր ուզում անել: «Ժառանգությունը» ապրիլի իննից հետո զրոյացավ»,- ասաց քաղաքագետը:

Ի դեպ, «Վարկած» ակումբի հյուրն ասաց, թե տարբերություն չի տեսնում Հայաստանի երեք իշխանությունների որակի մեջ. «Ես տարբերություն չեմ տեսնում նրանցում, բացի այդ, դա Լևոն Տեր-Պետրոսյանի ստեղծած համակարգն է, որը կուտակված է յուրայինների ձեռքում և առողջ ընդդիմություն ունենալ` չի կարող: Լևոն Տեր-Պետրոսյանի իշխանության գալուց ի վեր, հասարակությունը բաժանվեց երկու մասի»: