ԿԸՀ-ն արդեն հրապարակել է ընտրողների մասնակցության տվյալները` ժամը 11-ի դրությամբ:

Քվեարկությանը մասնակցել է 123121 ընտրող կամ` ընդհանուր թվի` 15,08%-ը:

Հատկանշական երկու դիտարկում եմ ուզում անել:

Ընտրություններին առայժմ հատկապես ցածր է մասնակցությունն Արաբկիր և Կենտրոն համայնքներում, համապատասխանաբար` 12,25 և 11,53%: Սա օրինաչափ է, որովհետև այս համանքներն, որպես կանոն, գտնվում են` ոչ միայն մայրաքաղաքի, այլ նաև` հանրապետության քաղաքական գործընթացների կիզակետում: Ըստ այդմ`այս համայնքներում էապես սահմանափակված է վարչական ռեսուրսի և ընտրակաշառքի ազդեցությունը:

Մասնակցության առումով` «գերազանցիկներ» են Աջափնյակ (19,90%), Ավան (19,49%) և Շենգավիթ (18,08%) համայնքները:

Ի դեպ, հենց այստեղից էլ ամենաշատն է տեղեկատվությունը կեղծիքների, խախտումների, ընտրակաշառքի վերաբերյալ:

Ավելորդ չէ հիշեցնել, որ մի քանի օր առաջ ԲՀԿ խմբակցության քարտուղար Նաիրա Զոհրաբյանը հայտարարել էր, որ Արագածոտնի մարզի 8000 ընտրողներ հաշվառվել են Աջափնյակ համայնքում` ընտրություններին մասնակցելու նպատակով:

Երևանի գործող քաղաքապետ Տարոն Մարգարյանն ապրում է Ավան համայնքում: Բացի այն հանգամանքը, որ նա այստեղ օբյեկտիվորեն ունի բարձր վարկանիշ, ըստ ամենայնի` առկա է նաև տեղական իշխանությունների «վիզ դնելու» գործոնը:

Սուրեն Սուրենյանց