Մի քանի օր առաջ խոսում էի սոցիոլոգ Ահարոն Ադիբեկյանի հետ: Նա մի հետաքրքիր դիտարկում արեց «Ժառանգության» էլեկտորալ հնարավորությունների մասին` ասելով, որ այդ կուսակցության ձևավորած «Բարև Երևան» դաշինքը գտնվում է անցողիկության շեմի վրա, տվյալ դեպքում` խոսքը 8%-ի մասին է:

Անկեղծ ասած, ես առանձնապես չհավատացի սոցիոլոգի դիտարկմանը, սակայն երեկ մտածեցի, որ Ադիբեկյանը գուցե ճիշտ է:

Երեկ Րաֆֆի Հովհաննիսյանի շարժման շուրջ ձևավորված դաշինքը հանրահավաք էր կազմակերպել Ազատության հրապարակում և հենց այդ միջոցառումն էր համարվում գլխավորը նախընտրական անցած օրվա թոհուբոհում:

Միանգամից նկատեմ, որ հանրահավաքի ժամը սխալ էր ընտրված. ժամը 15-ին մայրաքաղաքում անտանելի տոթ էր: Սակայն նույնիսկ այդ հանգամանքը չի կարող սփոփել  «Բարև Երևանի» առաջնորդներին. հրապարակում հավաքվել էր ընդամենը 300 մարդ` տաս անգամ ավելի պակաս, քան նախորդ օրը ՀԱԿ հրավիրած հանրահավաքին:

Եվ վերջապես հրապարակի երեկվա սակավամարդությունը կատարյալ դատարկության տպավորություն էր թողնում` փետրվար-ապրիլ ամիսներին նույն Րաֆֆիի նախաձեռնած բազմամարդ հանրահավաքների համատեքստում:

Իրավիճակը չի փրկել նույնիսկ «Ժառանգություն» կուսակցության գլխավոր քարտուղար Ստյոպա Սաֆարյանի այն հայտարարությունը, թե սա ոչ թե հանրահավաք է, այլ` հանդիպում Կենտրոնի ընտրողների հետ:

Արդ, կատարենք առաջին արձանագրումը` «Բարև Երևան» դաշինքը Երևանի ապագա ավագանիում կունենա խմբակցություն, սակայն` միայն այդքանը: Ասել կուզի, որ Րաֆֆի Հովհաննիսյանի կողմնակիցները պարտվելու են թե իշխանությանը և թե ընդդիմության լիդերության հարցում:

Փետրվարի 18-ի թեման փակվել էր դեռ ապրիլի 9-ին, եթե կուզեք` շատ ավելի վաղ: Սա Րաֆֆին կհասկանա արդեն մայիսի 5-ի երեկոյան:

Միանգամից նկատեմ, որ այս վիճակի հիմնական պատասխանատուն հենց  «Ժառանգություն» կուսակցության նախագահն է, որն այդպես էլ չկարողացավ կապիտալացնել այն քաղաքական հաջողությունն, որ ունեցել էր փետրվարի 18-ին:

Ըստ այդմ, երկվա հանրահավաքի մի շարք հայտարարությունների ադեկվատությունը միանգամայն կասկածելի է: «Ես պիտի մատուցեմ հայ ժողովրդին, ինչպես փետրվար 18-ին հայ ժողովուրդն ասաց, որ «տեր եմ իմ հայրենիքում», և նույն կերպ այդ անակնկալը կմատուցի «Բարև Երևանը»: Ինչքան կտեևի պայքարը, չգիտեմ, բայց հինգ տարի այս իշխանությունը չի նստելու Բաղրամյան 26–ում»,-հայտարարել է Րաֆֆի Հովհաննիսյանը:

Եթե նույնիսկ անակնակալի խնդիր կա, ապա` միայն սեփական նոսրացող շարքերի համար: Այդ մարդիկ մայիսի 5-ին իրոք զարմանալու են, թե երկու ամսում ինչպե՞ս պատահեց, որ 37%-ը դարձավ 10 կամ 12:

Եթե նույնիսկ ընդունենք, որ հանրապետականները ավագանիում մեծամասնություն չեն ունենալու և ձևավորվելու է քաղաքային նոր իշխանություն` ընդդիմադիր կոալիցիայի հենքով, ապա Րաֆֆու դաշինքը այդ միավարման ընդամենը մասնակիցն է լինելու` առանց առաջնորդի հավակնությունների: Թեկուզ և այն պատճառով, որ «Ժառանգությունը» լուրջ պրոբլեմներ ունի թե ՀԱԿ-ի, թե ՀՅԴ-ի և ԲՀԿ-ի հետ ու չի կարող հանդիսանալ կոնսոլիդացնող գործոն:

«Մենք չենք նահանջելու, չենք վաճառվելու, չենք դավաճանելու»,- երեկ Ազատության հրապարակում հավաքված մի քանի հարյուր մարդուն ասել է Րաֆֆի Հովհաննիսյանը:

«Չենք վաճառվելու, չենք դավաճանելու» խոստմանը գուցե հավատամ (թեև` վաճառվելու համար գնորդ է պետք, որն այս պահին առանց այն էլ չկա):

Այ, նահանջել-չնահանջելը`ոչ թե Րաֆֆուց, այլ` քաղաքական նոր իրավիճակից է կախված: Իսկ այդ նոր իրավիճակում Հովհաննիսյանն ընդամենը մեկն է լինելու` օրակարգ ձևակերպողներից:

ԲՀԿ-ն և եվրոպացիները

Երեկ ԲՀԿ առաջնորդ Գագիկ Ծառուկյանն ընդունել է Եվրոպական Պահպանողականների ու Ռեֆորմիստների կուսակցության պատվիրակությանը, որի հետ, ի թիվս այլ հարցերի, քննարկել է նաև Երևանի ավագանու ընտրությունների հետ կապված հարցը:

Ավելի կարևոր գործով է զբաղված եղել ընտրություններում ԲՀԿ համամասնական ցուցակի առաջին համար Վարդան Օսկանյանը: Նա Ֆեյսբուքում երկար-բարակ մի գրառում է արել, որի վերջում, սակայն, հստակ ֆիքսել է իր ակնկալիքները մայիսի 5-ի ընտրություններից:

«Ահա սա է այն հնարավորությունը, որ մենք ունենք այժմ՝ կիրակի օրը: Երևանի բնակիչների 60 տոկոսը պետք է ՈՉ ասի իշխող կուսակցության մենաշնորհին: Այդժամ մենք ընտրած կլինենք ավելի ծաղկուն քաղաք, երկիր և խաղաղ հարևաններ ունենալու մեր ճանապարհը»,- գրել ԱԳ նախկին նախարարը:

ՀԱԿ փոխնախագահ Արամ Մանուկյանը նույնպես երեկվա ասուլիսում ընդդիմադիր հետընտրական դաշինքի ձևավորման հույս է հայտնել:

Հանդիպումներ

ԲՀԿ համամասնական ցուցակի ղեկավարները, նաև` ԲՀԿ խորհրդարանական խմբակցության քարտուղար Նաիրա Զոհրաբյանն երեկ հանդիպումներ են ունեցել Մերգելյանի բակում ու Չարբախում և դարձյալ քննադատել են իշխանությունների վարած քաղաքականությանը:

Քանաքեռ-Զեյթուն համայնքում նույնաբովանդակ ելույթներ են ունեցել ՀՅԴ Հայաստանի Գերագույն մարմնի ներկայացուցիչ Արմեն Ռուստամյանն ու Բյուրոյի անդամ Դավիթ Լոքյանը:

Երևանի գործող քաղաքապետ Տարոն Մարգարյանն` ընտանիքի հետ, մասնակցել է Երևանի կենդանաբանական այգու նոր տարեշրջանի բացմանը: ՀՀԿ քաղաքապետի թեկնածուն մասնակցել է նաև Կորյուն փողոցի վրա գտնվող «Իմպերիալ պալաս» հյուրանոցի բացմանը:

ՕԵԿ-ն` «Արմենիա Մարիոթ» հյուրանոցում, Արթուր Բաղդասարյանի գլխավորությամբ ակտիվի ժողով է անցկացրել ու ամփոփել է ընտրարշավը: Կուսակցության քաղաքապետի թեկնածու Արմեն Երիցյանը հավաստիացրել է, որ հաղթելու է և ասել է, թե երեք ամիսը մեկ հաշվետու է լինելու ժողովրդին:

Սուրեն Սուրենյանց