Երեկ սոցիոլոգիական հարցումների առատ անձրև է տեղացել:

Ներկայացվել են սոցհարցումների միանգամից մի քանի հետազոտություններ, բնականաբար` տարբեր կազմակերպությունների կողմից:

Այդ հարցումներն ունեն սկզբունքային մի քանի ընդհանրություններ և այնպիսի տպավորություն է, որ, տվյալ դեպքում, գործ ունենք ուղղորդող մեկ կենտրոնի հետ:

Որ ՀՀԿ-ն այս ընտրությունների ֆավորիտներից մեկն է, գուցե նաև` գլխավոր ֆավորիտը, կասկածից վեր է: Սակայն կասկածելի է, որ Տարոն Մարգարյանի գլխավորած ցուցակն այդքան հեշտ հաղթանակ կտանի ավագանու ընտրություններում: Իսկ այդ մասին միաբերան վկայում են Ահարոն Ադիբեկյանը, Հայաստանի սոցիոլոգիական ընկերակցությունը և Gallup International association-ը (չշփոթել` իրական Gallup-ի հետ):

Ըստ նույն հարցումների` ապագա ավագանիում հաստատապես խմբակցություններ ունենալու են նաև ԲՀԿ-ն և«Բարև Երևան» դաշինքը, տեսական հնարավորություններ ունի նաև` ՕԵԿ-ը: Հայկական սոցիոլոգիայի հայրերը բավական մռայլ կանխատեսումներ են արել ՀԱԿ և ՀՅԴ կուսակցությունների մասով, ավելորդ է ասել, որ ընդհանրապես չեն հիշատակել «Առաքելություն» կուսակցությանը:

Հարցումների թվերը միտումնավոր չենք ներկայացնում, միայն արձանագրենք, որ դրանք ՀՀԿ-ի հաղթանակ են կանխատեսում` նույնիսկ առանց ՕԵԿ-ի աջակցության:

Իսկ հարցման թվերը չենք հրապարակում առավելապես այն պատճառով, որ մեր ընթերցողը դրանց միևնույն է` չի հավատալու:

Մեզանում` սոցիոլոգիական հարցումները վաղուց չեն արտահայտում հասարակության իրական տրամադրությունները, դրանք ավելի շուտ ուղղորդում են հասարակական կարծիքն`իշխանության ցանկությունների համատեքստում: Այս հարցումները, բնականաբար, բացառություն չեն:

Հիմա` բուն քարոզարշավի մասին:

Գործող քաղաքապետ Տարոն Մարգարյանն այցելել է Մալաթիա- Սեբաստիա համայնք, ընտրողներին պատմել է իր արածների մասին, խոստացել է մայրաքաղաքի համաչափ զարգացում:

ԲՀԿ-ի երեկվա գրաֆիկը գերհագեցած է եղել:

Նախ, Հովհաննես Թումանյանի տուն թանգարանում բացվել է կուսակցության անդամ նկարիչների գործերի ցուցահանդեսը: Երեկվա ընթացքում ԲՀԿ ներկայացուցիչները հասցրել են լինել Մալաթիա-Սեբաստիա համայնքում, Հաղթանակ թաղամասում:

Կուսակցության ցուցակի առաջին համար Վարդան Օսկանյանն ու ԲՀԿ խորհրդարանական խմբակցության քարտուղար Նաիրա Զոհրաբյանը քննադատել են իշխանություններին:  Զոհրաբյանը խոսել է նաև խորհրդային ավանդների մասին, թեև` դժվար է պատկերացնել դրանց ու այս ընտրությունների կապը:

Ի դեպ, ԱԺ պատգամավորը լրագրողներին ասել է, թե իրենց կուսակցության 100 անդամ այս ընթացքում ազատվել է աշխատանքից` բացառապես ԲՀԿ անդամ լինելու պատճառով:

«Բարև Երևան» դաշինքի քաղաքապետի թեկնածու Արմեն Մարտիրոսյանն Էրեբունու ընտրողներին ներկայացրել է իր պատկերացումներն Երևանի կառավարման համակարգի բարեփոխումների մասին:

Նախօրեին ՕԵԿ ցուցակը գլխավորող Արմեն Երիցյանը հեգնանքով էր արտահայտվել «Բարև Երևանի» պլակատի վրա պատկերված Րաֆֆի Հովհաննիսյանի և Արմեն Մարտիրոսյանի ձեռքսեղմումի մասին: Մարտիրոսյանն երեկ գռեհկաբանություն է որակել արտակարգ իրավիճակների նախարարի պաշտոնակատարի ասածները:

Ի դեպ, երեկ «Բարև Երևան» դաշինքի ներկայացուցիչը ԿԸՀ է ներկայացրել ՀՀԿ-ի կողմից իրականացված ընտրախախտումների նոր փաստեր և պահանջել է չեղյալ հայտարարել կառավարող կուսակցության գրանցումը:

Մենք խնդիր ենք դրել քաղաքացուն վերադարձնել իշխանությունը ոչ թե պարզապես բառերով, այլ շատ կոնկրետ, պրակտիկ քայլերով: Այս մասին երեկ լրագրողների հետ հանդիպմանն ասել է Երևանի ավագանու ընտրություններում Հայ ազգային կոնգրեսի նախընտրական ցուցակի 11-րդ տեղում գտնվող Արամազդ Ղալամքարյանը՝ նշելով, որ ավագանու խմբակցություններին տրված լիազորությունները պետք է ամբողջությամբ իրացվեն:

Նույն կուսակցության ցուցակի երկրորդ համար Զոյա Թադևոսյանը հարցազրույց է տվել ԳԱԼԱ-ին ու ՀՀԿ-ն անվանել հանցագործների թիմ:

ՀՅԴ մի քանի տասնյակ անդամներ քայլերթ են կազմակերպել Կոմիտաս փողոցով` միմչև մետրոյի «Բարեկամություն» կայարան: Ճանապարհին նրանք մարդկանց բաժանել են իրենց բուկլետները, երգել են հայրենասիրական երգեր:

Դաշնակցության համամասնական ցուցակի առաջին եռյակը հանդիպում է ունեցել նաև Տիգրան Մեծի 36 շենքի ընտրողների հետ և կարևորել է քաղաքական և համակարգային բարեփոխումների իրականացումը: ՀՅԴ փոխներկայացուցիչ Աղվան Վարդանյանը քննադատել է ՀՀԿ-ին: Նա մասնավորապես ասել է. «Սա անձի ընտրություն չէ, այլ քաղաքական ուժի: Տարոնին`էդ ջահել տղուն դեմ են տվել, որ «ծածկեն» իրենց, որովհետև երես չունեն ասելու` ընտրեք ՀՀԿ—ին: 4 տարում 3 քաղաքապետ են նշանակել և չի բացառվում, որ մի աննշան սխալի համար էդ ջահել տղուն էլ հետո փոխեն»:

ՀՅԴ համամասնական ցուցակի երրորդ համար Արսեն Համբարձումյանը լրագրողներին ասել է, որ այս պահին ՀՅԴ շանսերն ավելի բարձր են, քան էին` խորհրդարանական ընտրությունների ժամանակ:

ՕԵԿ ցուցակի առաջին համար Արմեն Երիցյանը Կենտրոնի բնակիչներին կոչ է արել` տեր կանգնել Երևանին, ինքն էլ, ընտրվելու պարագայում` խոստացել է երեք ամիսը մեկ անգամ հանդես գալ հաշվետվությամբ:

Եվ վերջում` քաղաքական ուժերի կատարած ծախսերի մասին:

Ապրիլի 25-ի դրությամբ Երևանի ավագանու մայիսի 5-ի ընտրություններին մասնակցող 7 քաղաքական ուժերից նախընտրական քարոզչության նպատակով հիմնադրամներից կատարված ծախսերի առումով առաջատարը շարունակում մնալ ՀՀԿ-ն, որը հիմնադրամ մուտքագրված 70 մլն 330 հազար 400 դրամից ծախսել է 57 մլն 452 հազար 23-ը: Ամենաքիչ ծախսեր կատարել է «Առաքելություն» կուսակցությունը, ընդ որում ապրիլի 19-ից ի վեր վերջինիս հիմնադրամում ֆինանսական մուտքերի և ելքերի շարժ չի արձանագրվել. մուտքագրված 1 մլն 60 հազար դրամից ծախսվել է 1 մլն 59 հազար 400-ը: Կենտրոնական բանկից ստացված տվյալների հիման վրա Կենտրոնական ընտրական հանձնաժողովի վերահսկիչ-վերստուգիչ ծառայության կազմած տեղեկանքի համաձայն՝ ապրիլի 25-ի դրությամբ ՀՀԿ-ից հետո հաջորդ առավել շատ ծախսեր կատարածը ԲՀԿ-ն է: Վերջինիս հիմնադրամի մուտքերն ապրիլի 19-ից հետո մնացել են անփոփոխ՝ 45 մլն 992 հազար դրամ, սակայն աճել են ծախսերը՝ կազմելով 44 մլն 576 հազար 554 դրամ: ՕԵԿ-ը մուտքագրված 23 մլն 785 հազար 150 դրամից ծախսել է 22 մլն 660 հազար 608-ը: «Հայ ազգային կոնգրես»-ի հիմնադրամ մուտքագրված 16 մլն 799 հազար 400 դրամից ծախսվել է 14 մլն 851 հազար 500-ը: «Բարև Երևան» դաշինքի հիմնադրամ մուտքագրված 5 մլն դրամից ծախսվել է 4 մլն 395 հազար 4-ը: ՀՅԴ-ի հիմնադրամի 5 մլն դրամի մուտքերը քարոզարշավի սկզբից ի վեր մնացել են անփոփոխ, որից ապրիլի 25-ի դրությամբ ծախսվել է 2 մլն 865 հազար 600-ը:

Սուրեն Սուրենյանց