Ոստիկանության Շիրակի մարզային վարչության ծառայողների ձեռնարկած միջոցառումների արդյունքում՝ նշված հանցագործությունը կատարելու կասկածանքով, Բագրատաշենի սահմանային անցակետից ոստիկանության Գյումրիի բաժին բերման է ենթարկվել Գյումրիի նախկին քաղաքապետ Վարդան Ղուկասյանի եղբորորդին՝ Կոլյա Ղուկասյանը:

Ավելի վաղ տեղեկացրել էինք, որ այսօր՝ ապրիլի 23-ին, Ժամը 13.00-ի սահմաններում, Գյումրիի բժշկական կենտրոնից ոստիկանության Գյումրիի բաժնում ահազանգ է ստացվել, որ Գյումրի քաղաքի Շիրակացի 54բ շենքի մոտից հրազենային վնասվածքներով իրենց մոտ են տեղափոխվել Հարություն Խաչատրյանը և Արտյոմ Կարապետյանը: Վերջինս հիվանդանոցում մահացել է:

Ոստիկանության լրատվական ծառայությունից հայտնում են, որ փաստի առթիվ ոստիկանության Շիրակի մարզի քննչական բաժնում հարուցվել է քրեական գործ ՀՀ քրեական օրենսգրքի104 հոդվածի հատկանիշներով:

Ձեռնարկվում են օպերատիվ-հետախուզական և քննչական միջոցառումներ հանցագործությունը կատարած անձանց ինքնությունը պարզելու և նրանց հայտնաբերելու ուղղությամբ:

Նշանակվել են փորձաքննություններ:

Նախաքննությունը շարունակվում է:

Նշենք, որ Արտյոմ Կարապետյանը քրեական աշխարհում հայտնի է «Շեկո» մականվամբ:

Լուսանկարը՝ «Շիրակ կենտրոնի»