Այսօր «Վարկած» մամուլի ակումբում հյուրընկալվեց «Բարև Երևան» նախընտրական դաշինքի ցուցակի չորրորդ համար, «Ժառանգություն» կուսակցության վարչության գլխավոր քարտուղար Ստյոպա Սաֆարյանը:

Նա խոսեց «Նոր Հայաստան» շարժման մասին՝ նկատելով, որ դա Րաֆֆի Հովհաննիսյանի և հազարավոր քաղաքացիների ապրիլի 9-ին տեղի ունեցած երդմնակալության շարունակությունն է:

Ակումբի հյուրը հանգամանալից անդրադարձավ Երևանի ավագանու ընտրություններին, կանխատեսեց, որ իրենց դաշինքը ստանալու է երևանցիների մեծամասնության վստահության քվեն:

«Ժառանգության» ներկայացուցիչը ՀՀԿ-ի համար կանխատեսեց 10-20% քվե: «Դա տեղի կունենա ոչ թե այն պատճառով, որ ժողովուրդը նրանց այդքան սիրում է, ուղղակի նրանք, ինչպես միշտ, օգտագործում են վարչական ռեսուրսը: Ես նաև բարձր եմ գնահատում ԲՀԿ-ի շանսերը, որը նույնպես օգտագործում է իր ձեռքի տակ եղած վարչական ռեսուրսը»,- ասաց Սաֆարյանը:

Ի դեպ, ընդդիմադիր գործիչը կասկած հայտնեց, որ ՀԱԿ-ն ու ԲՀԿ-ն կհաղթահարեն անցողիկության շեմը:

«Բարև Երևան» դաշինքի համամասնական ցուցակի չորրորդ համարը խոսեց քաղաքային մի շարք խնդիրների մասին, կարևորեց, որ Երևանի հասարակական տրանսպորտում ավտոբուսների ներգարավվածությունը լինի 88%:

Խոսելով Երևանի կառավարման համակարգի բարեփոխումների մասին՝ Սաֆարյանը նկատեց. «Անհրաժեշտ է, որ ավագանու նիստերը օնլյան հեռարձակվեն, որ ժողովուրդը ծանոթանա ներկայացուցչական մարմնի անդամների մակարդակի հետ: Բացի այդ, Երևանի համար կարևոր այս կամ այն հարցի կապակցությամբ անհրաժեշտ է հաշվի առնել բնակչության կարծիքը, իսկ դրա համար հարկավոր են հանրաքվեներ»: