Երեկ ընդդիմությունն իր նախընտրական միջոցառումները հիմնականում անցկացրեց մայրաքաղաքի հյուսիսում:

ՀԱԿ համամասնական ցուցակի առաջին համար Վահագն Խաչատրյանն ու ավագանու մյուս թեկնածուներն ընտրողներին հանդիպել են Ավան համայնքում` գործող քաղաքապետի թաղամասում:

Չնայած ՀԱԿ ակտիվիստները պարզել են իշխանությանը և քաղաքապետարանին քննադատող պլակատներ, հնչած ելո,ւյթները նույնպես ունեցել են այդ բովանդակությունը` հանրահավաքն անցել է առանց միջադեպերի և ավարտվել է նախատեսվածից շուտ` անձրևի պատճառով:

Վ. Խաչատրյանն իր ելույթում ասել է, թե ՀՀԿ-ն կործանում է Հայաստանը:

ՀԱԿ ցուցակի չորրորդ համար Վլադիմիր Կարապետյանն, իրենց թեկնածուի անունից, ևս մեկ անգամ բանավեճի է հրավիրել Տարոն Մարգարյանին: «Տղա է թող գա խոսի, բացատրի, թե որտեղից իրեն այդ գումարները, ինչպես է կուտակել այդ միջոցները, բնակարանները»,-ասել է Կարապետյանը:

Կոնգերսի վարչության անդամ Արամազդ Ղալամքարյանը հարցազրույց է տվել 7or.am կայքին և պատասխանել է հանրապետականների այն պնդումներին, թե երևանցիները սիրում են Տարոնին: «Գիտե՞ք ինչ, ես հարկեր եմ վճարում ոչ թե այն բանի համար, որ սիրելի անձնավորություն ունենամ քաղաքապետարանում, այլ որ ապրեմ հարմարավետ, մաքուր, կանաչ, առողջ, զարգացող քաղաքում: Ինձ, որպես քաղաքացու, պետք է ունենալ թափանցիկ ու հաշվետու քաղաքապետարան, այլ ոչ թե սիրո օբյեկտ: Մյուս կողմից՝ նույնիսկ այդ փչոցին կհավատայի, եթե հասկանայի, թե հանուն ինչի պետք է սիրեն Տարոնին: Այն բանի համար, որ անհայտ եղանակով դարձել է միլիոնատե՞ր: Դե թող դրա ձևը մեզ էլ ասի, լա՞վ: Կամ՝ այն բանի համար, որ բանակում չի ծառայել, բայց պարգևատրվել է Երկրապահների միության մեդալո՞վ: Թե՞ որ քաղաքը ողողել էր անճաշակության գագաթնակետ լուսատու կենդանիներով ու «ծառերով»: Թե՞ այն բանի համար, որ քաղաքի կենտրոնում ավիրում են «Ծածկած շուկան», իսկ ինքը խոշոր բիզնեսի դեմ անօգնական է: Ասացեք, ինչո՞վ պետք է նա արժանանար սիրո»,- ասել է ընդդիմադիր գործիչը:

ՀԱԿ կուսակցության փոխնախագահ Լևոն Զուրաբյանը դժգոհ է հանրապետականներից և ոստիկաններից, ովքեր, ըստ նրա, խոչընդոտել են ՀԱԿ իրականացրած քարոզարշավը: «Պահանջում եմ անմիջապես դադարեցնել քաղաքացիների իրավունքների ոտնահարումը և ապօրինությունները, քաղաքական չեզոքության դիրքերից պատշաճորեն պահպանել հասարակական կարգը, պաշտպանել քաղաքացիների ընտրական իրավունքները՝ համաձայն Հայաստանի Հանրապետության Սահմանադրության և օրենքների: Առաջարկում եմ Հայ ազգային կոնգրեսի ընտրական շտաբին տեղյակ պահել ընտրական գործընթացի օրինականության պահպանման համար պատասխանատու ոստիկանական պաշտոնյաների անունների և կոնտակտային տվյալների մասին, ինչը թույլ կտա ապօրինությունների կանխման նպատակով արագ արձագանքման մեխանիզմներ ստեղծել»,— ՀՀ ոստիկանապետ Վլադիմիր Գասպարյանին հասցեագրված նամակում գրել է Զուրաբյանը

ՀՅԴ համամասնական ցուցակի առաջին համարները քայլերթ են կազմակերպել Նոր Նորքում, մտել են խանութներ, մարդկանց բուկլետնռր են բաժանել: Նրանք նաև այցելել են նաև ճանապարհին հանդիպած ՀՀԿ և ԲՀԿ շտաբներ:

«Առաքելություն» կուսակցության ղեկավարներն իրենց քարոզչական նյութերն են բաժանել Շենգավիթ համայնքում: «Սոցիոլոգիական հարցումներ էլ չենք պատվիրել, բայց կարծում ենք, որ ավագանու կազմում ներգրավվածություն կունենանք»,– վստահություն է հայտնել «Առաքելության» համամասնական ցուցակի առաջին համար Մեսրոպ Առաքելյանը` tert.am-ի հետ զրույցում:

«Բարև Երևան» նախընտրական դաշինքի քաղաքապետի թեկնածու Արմեն Մարտիրոսյանը Մալաթիա-Սեբաստիա համայնքի ընտրողներին ասել է, թե միայն իրենց ուժը կարող է փոփոխություններ կատարել երկրում:

tert.am կայքին տված հարցազրույցում նույնաբովանդակ կարծիք է հայտնել նաև դաշինքի նախընտրական շտաբի ղեկավար, նախկին օեկ-ական Գագիկ Բաղդասարյանը: Նրա կարծիքով՝ Արմեն Մարտիրոսյանը քաղաքապետի հենց այն տեսակն է, որով իրենք երևանցուն առաջարկում են իրենց տեսակն ու ոճը: Նա կրկին հիշեցրել է, որ «Բարև Երևան» դաշինքը շարունակությունն է «Բարև Հայաստանի», և իրենք քարոզարշավն անում են որպես «Բարևի» հեղափոխության շարունակություն՝ գնալով իշխանափոխության:

ԲՀԿ համամասնական ցուցակի առաջին համար Վարդան Օսկանյանն ու մյուս թեկնածուներն ընտրողներին հանդիպել են իրենց կուսակցական ընկերոջը` ԱԺ պատգամավոր Վահան Կարապետյանին պատկանող «Cherri» ռեստորանում: Լենինգրադյան փողոցի վրա գտնվող այս ռեստորանում ԲՀԿ անդամները դարձյալ քննադատել են կառավարությանը: Օսկանյանն ասել է, որ հայտարարվող տնտեսական աճը մանիպուլյացիայի դրսևորում է, ԱԺ ԲՀԿ խմբակցության քարտուղար Նաիրա Զոհրաբյանը մեղադրել է կառավարությանը` խոստումները չկատարելու համար:

ԱԺ պատգամավոր Ստեփան Մարգարյանը դժգոհել է վերելակների աշխատանքից:

ՕԵԿ քաղաքապետի թեկնածու, Արտակարգ իրավիճակների նախարարի պաշտոնակատար Արմեն Երիցյանն երբեմն կատարում է շեշտադրումներ, որոնք կարող ենք լսել ընդդիմադիրների շուրթերից:

Երեկ Նորք Մարաշում Երիցյանը խոսել է մենաշնորհի բացասական երևույթների, վախի մթնոլորտի, արտագաղթի մասին: Նա մասնավորապես ասել է. «Ժամանակն է, որ տիրություն անենք մեր Երևանին և դա պետք է անենք միասին: Այս ուղղությամբ անելիքներ շատ ունենք: Հիմա մատների վրա եկեք հաշվենք տեսնենք քանի նորքեցի է մնացել: Ես կարող ա՞ երևանցի չեմ, չգիտեմ ովքեր են ապրել: Հիմա բոլոր երևանցիները կամաց—կամաց վաճառում են Երևանի կենտրոնի իրենց տները, որովհետև փող չունեն, քյասիբ են: Էդ ուրիշ բան, որ գյուղից գան առնեն, նորմալ մարդիկ լինեն, բայց նաև աննորմալ երևույթներ են գալիս: Մի հատ ռաբիզ տուն են սարքում ու թողնում գնում: Դրա համար էլ սիրտները չի ցավում, դրա համար էլ այնպես պետք է անենք, որ սիրտներս ցավա»:

Ընտրարշավի ֆավորիտը` Տարոն Մարգարյանն, երեկ այցելել է Դավիթաշեն համայնք: Ի դեպ, քաղաքապետի հանդիպմանը ներկա են եղել նաև մանկապարտեզահասակ երեխաներ, ինչն առնվազն տարակուսելի է: Երևանի քաղաքապետը խոստացել է վերականգնել անտառային այգիներն այնտեղ, որտեղ դա հնարավոր է:

Սուրեն Սուրենյանց