Միջազգային կառույցներն ու հայաստանյան ընդդիմությունը կարևորում են Երևանի ավագանու օրինական ընտրությունների անցկացումը:

Իհարկե, նման պահանջ միշտ է եղել, բայց, այս դեպքում, այն հատկապես կարևոր է` նախագահական ընտրություններում առաջընթացի, ըստ էության, բացակայության ֆոնին:

«Մենք հույս ունենք, որ ընդդիմությունը խաղաղ կպայքարի, հույս ունենք, որ իշխող կուսակցությունը և բոլոր կուսակցությունները կխուսափեն ընտրակաշառքներից և վարչական ռեսուրսների չարաշահումից: Մենք հույս ունենք, որ ընտրություններն ազատ և արդար կլինեն, և Երևանի բնակիչները կկարողանան ընտրել քաղաքի ավագանուն, որը հետո կընտրի քաղաքապետին այնպես, որ յուրաքանչյուրին ձեռնտու կլինի: Հույս ունեմ՝ հենց սա տեղի կունենա»,— «168 ժամ» թերթի հետ զրույցում երեկ ասել է Հայաստանում Միացյալ Նահանգների դեսպան Ջոն Հեֆերնը:

Մինչ ընդդիմադիր կուսակցությունների ղեկավարներն օրերով քննարկում են, հաճախ անարդյունավետ, համագործակցության տարբեր ձևաչափեր` դրա պրակտիկ լուծումը գտել են ՀԱԿ և ԲՀԿ Նոր Նորքի կառույցները: Իհարկե, խոսքը, տվյալ դեպքում` մի համայնքի շրջանակներում համագործակցության և ընտրությունների օրինականությունն ապահովելու մասին է:

Վերադառնանք բուն ընտրարշավին:

Ինչ է երեկ խոսել գործող քաղաքապետ Տարոն Մարգարյանը Նորք Մարաշում` հազիվ թե հիշվի: Բայց նորքեցի երեխաները կհիշեն, որ հենց քաղաքապետի գալու օրն իրենք ֆուտբոլի նոր դաշտ ունեցան: Տարոնն էլ կհիշի մի տատիկի անկեղծ խոստովանություն. նա մոտեցել է մեքենա նստող քաղաքապետին ու ասել է. «Բալա ջան հանգիստ գնա, ես երազս տեսել եմ, ու դու ես ընտրվել, իսկ իմ երազները ինձ չեն խաբում»:

Համաձայնեք` այս օրհնանքն ավելին արժի, քան` Տարոնին քծնողների երկար-բարակ ելույթները:

Ի դեպ, երեկ նույնպես Տարոն Մարգարյանը հրաժարվել է պատասխանել լրագրողների հարցերին:

Իսկ ահա ԱԺ հանրապետական փոխխոսնակ Էդուարդ Շարմազանովի տրամադրությունը բարձր է եղել: Նա ՀՀԿ խորհրդի նիստից հետո, բրիֆինգի ժամանակ, ասել է, որ Տարոն Մարգարյանը վերընտրվելու մեծ շանսեր ունի:

ՀՀԿ մեկ այլ պատգամավոր` Կարեն Ավագյանը, սևեռվել է ԲՀԿ թեմայի վրա: «Ծառուկյանը լվացել է ձեռքերը և չի ուզում մասնակիցը դառնալ 2-3-րդ տեղի համար մղվող պայքարին»— ֆեյսբուքյան իր էջում գրել է Ավագյանը:

ԲՀԿ-ում, բնականաբար, այդպես չեն մտածում ու շարունակում են ակտիվ քարոզարշավը:

ԲՀԿ ավագանու թեկնածուներն երեկ հանդիպել են փոքր և միջին բիզնեսի ներկայացուցիչներին:

Նաիրա Զոհրաբյանը, ինչպես միշտ, քննադատել է իշխանությանը, Գուրգեն Արսենյանը նկատել է, որ Հայաստանը դարձել է ուղեղ և աշխատող ձեռքեր արտահանող երկիր: Խոսքն, անշուշտ, արտագաղթի մասին է:

ԲՀԿ ցուցակի առաջին համար Վարդան Օսկանյանը ԵԽ գլխավոր քարտուղարի հետ հանդիպմանը կարևորել է օրինական ընտրությունների, իսկ «Հայկական ժամանակ» օրաթերթին տված հարցազրույցում` ընդդիմության միավորման խնդիրները:

«Բարև Երևան» դաշինքի առաջին համար Արմեն Մարտիրոսյանը`tert.am կայքին տված հարցազրույցում, վստահ խոսել է իրենց հաղթանակի մասին և բարձր տրամադրությամբ ուղևորվել է Արաբկիր համայնք: Այստեղ նա խոսել է քաղաքային խնդիրների մասին, բայց նաև քննադատել է ընդդիմադիր մյուս ուժերին. «Հարգելիներս, ո՞ւր էիք փետրվարի 18-ին, ինչո՞ւ չպայքարեցիք միասին, ո՞ւր էիք ապրիլի 9-ին, ինչո՞ւ ժողովրդի կողքին չէիք, թե՞ դուք «Հանրապետական» կուսակցության նման եք ժողովրդի հետ, թե՞ ձեր խնդիրը բոլորովին այլ հարթությունում է»:

ՀԱԿ-ը երեկ հանդիպումներ ընտրողների հետ չի անցկացրել: Փոխարենը` ասուլիս է տվել կուսակցության փոխնախագահ Լևոն Զուրաբյանը: Նա ասել է, որ առաջիկա ընտրություններում ընդդիմության հաղթանակի դեպքում` կթուլանա ռեժիմն ու իշխանափոխության հնարավորություն կլինի:

ՀԱԿ ընտարարշավը ագրեսիվ է լինելու: «Ապրիլի 30-ին կլինի համապետական հանրահավաք՝ Ազատության հրապարակում: Քննադատության միակ թիրախը լինելու են իշխանությունները: Մասնավորապես՝ ակնհայտ է, որ այս քաղաքապետարանը, ինչպես համագումարին ասաց Լևոն Տեր—Պետրոսյանը, իսկապես խամաճիկ է իշխանությունների ձեռքում։ Մի կառույց է, որ սպասարկում է ավազակապետությանը և օլիգարխներին»,- ասել է ԱԺ պատգամավորը:

ՀԱԿ ցուցակի չորրորդ համար Վլադիմիր Կարապետյանը հարցազրույց է տվել ilur.am կայքին և ասել է` ընտրել Տարոնին` նշանակում է ընտրել Սերժին: Խեղճ ընտրող` տեղից ելնողր նրան ահաբեկում է:

«Սասուն» երկրապահ ջոկատի հրամանատար, նախկին քաղբանտարկյալ Սասուն Միքայելյանը բացառել է իր անդամագրումը ՀԱԿ-ին, սակայն ասել է, որ ավագանու ընտրություններում պաշտպանելու է այդ կուսակցությանը` հաշվի առնելով ցուցակի առաջին համար Վահագն Խաչատրյանի անձնական գործոնը:

Վերջապես մեկնարկել է ՀՅԴ քարոզարշավը:

Համամասնական ցուցակի առաջին համար Արմեն Ռուստամյանը Մալաթիա-Սեբաստիա համայնքի ընտրողներին խոստացել է անձամբ մասնակցել այսօր Րաֆֆի Հովհաննիսյանի նախաձեռնած քաղաքացիական ժողովին, ինչպես նաև կարևորել է ընդդիմության համախմբումը հետընտրական փուլում:

Մեկ այլ դաշնակցական` ԱԺ պատգամավոր Արծվիկ Մինասյանը, «Ուրվագիծ» հաղորդման եթերում խոստացել է չորս տարում հնգապատկել Երևանի բյուջեն` իրենց հաղթանակի դեպքում:

«Առաքելություն» կուսակցության առաջին համար Մեսրոպ Առաքելյանը խոստացել է մայրաքաղաքային բյուջեի մուտքերն ավելացնել 9 միլիարդ դրամով` մեկ տարվա կտրվածքով:

Իսկ ահա ՕԵԿ քաղաքապետի թեկնածու Արմեն Երիցյանն ամեն հանդիպմանը ի ցույց է դնում Երևանի իր իմացությունը: Երեկ Դավիթաշեն համայնքում նա ասել է. «Կարծում եմ՝ դավիթաշենցիները պետք է հպարտանան, որ արտակարգ իրավիճակների նախարարությունը Դավիթաշենում է, իսկ ԱԻՆ—ի աշխատակիցները պետք է հպարտանան, որ Դավիթաշենում ենք ու դավիթաշենցի ենք: Ես սիրահարվել եմ իմ Դավիթաշենին: Ժողովուրդը շատ բարի է»:

Ի դեպ, times.am կայքի հարցին ի պատասխան` Երիցյանն ասել է, թե կհրաժարվի ավագանու մանդատից, եթե քաղաքապետ չընտրվի:

Երևանում կան քաղաքացիներ, ովքեր չեն ուզում սպասել մնչև մայիսի 5-ը և մտադիր են հենց այսօր հանրահավաք անցկացնել քաղաքապետարանի մոտ և պահանջել  Տարոն Մարգարյանի հրաժարականը` կատարած, իրենց իսկ ձևակերպմամբ, հանցագործությունների համար:

Սուրեն Սուրենյանց