Վաղը մարզահամերգային համալիրում տեղի է ունենալու, ըստ պաշտոնական տվյալների, վերընտրված նախագահ Սերժ Սարգսյանի երդմնակալության արարողությունը:

Ո՞վ է հրավիրված ԱԺ հատուկ նիստին, ո՞վ է մասնակցելու այդ նիստին, իսկ ով՝ ոչ: Սրանք են ինտրիգայնությամբ հարուստ և իրական քաղաքականության հետ աղերս չունեցող այսօրվա օրակարգի հարցադրումները, որոնք հուզում են լրագրողներին, քաղաքական անցուդարձին հետևող մարդկանց:

«Սև-սպիտակի» բանաձևը դարձյալ գործելու է: ՀՀԿ-ն և ՕԵԿ-ը պաշտպանել են Սերժ Սարգսյանի թեկնածությունը, ուրեմն՝ ընտրությունները լավն են համարում, նախագահին՝ ընտրված, և կազմ-պատրաստ կներկայանան ինագուրացիային:

ՀԱԿ-ն ու ՀՅԴ-ն բացակա էին նախագահական ընտրություններից՝ իրենց փայ բացական կստանան նաև խորհրդարանի վաղվա նիստից:

«Ժառանգություն» կուսակցությունը համարում է, որը ընտրությունները կեղծել են, որ իրական հաղթողը Րաֆֆի Հովհաննիսյանն է, արդ՝ այլընտրանքային երդմնակալություն կկազմակերպի Ազատության հրապարակում:

Ի՞սկ ԲՀԿ-ն: Այս ուժն ոչ ընդդիմություն է, ոչ էլ՝ իշխանություն: Այ, նրանց մասնակցել-չմասնակցելու հարցն ինտրիգ էր: Ինտրիգը, կարծում եմ, հանգուցալուծվեց և մենք հասկացանք, թե ինչ ասել է՝ այլընտրանք: Գագիկ Ծառուկյանը Սարգսյանի ինագուրացիային չի մասնակցի, որովհետև… արտերկրում է: Արտերկրում գտնվելը՝ քաղաքական դիրքորոշում չէ, ավելի ճիշտ՝ դիրքորոշում արտահայտելու կամքի կամ ցանկության բացակայություն: Սա է հայկական այլընտրանքը: Ճշգրտորեն կարելի է կանխատեսել, թե ինչպես իրենց կպահեն մյուս բհկ-ականները: Նրանց քաղաքական թևը կգերադասի երդմնակալության նիստին չմասնակցել, գործարար հատվածը կմասնակցի՝ հանրապետական խանդավառությամբ:

Երկրորդ ինտրիգն էլ հանգուցալուծվեց. Ռոբերտ Քոչարյանը մասնակցելու է Սարգսյանի երդմնակալությանը: Դե, հո երկու ղարաբաղցի չե՞ն վիճելու: Ի վերջո, Քոչարյանը թույլ չէր տալու, որ իր հնարավոր բացակայությանը Սարգսյանն անդրադառնար «Սիրուն չի, Ռոբերտ ջան» ավանդական դարձած կշտամբանքով:

Մի հետաքրքիր իրադարձության մասին ևս: Եթե նույնիսկ Րաֆֆին փոշմանի ու վաղն այլընտրանքային երդմնակալություն չանի, միևնույն է՝ գործող նախագահի երդմնակալությանը մասնակցել չի կարող: «Չենք հրավիրել, որովհետև ինքը գտնում է, որ ինքն է ընտրվել նախագահ»,- այսօր ասել է Ազգային ժողովի նախագահ Հովիկ Աբրահամյանը՝ չհասկացողների համար ևս մեկ անգամ ակնարկելով, որ սահմանադրական բարեփոխումների հանձնաժողովի նախագահի պաշտոնն այն առավելագույնն է, ինչ իշխանությունները նախատեսել են «Բարևի հեղափոխության» առաջնորդի համար:

Ի դեպ, այսօր Աբրահամյանը հումորով և հեգնանքով է խոսել Րաֆֆու մասին՝ կարծես հասկացնելով, որ նրա կապրիզներից իշխանությունը հոգնել է:

Սուրեն Սուրենյանց