Երևանի ավագանու մայիսի 5-ի ընտրություններին մասնակցելու հայտ է ներկայացրել «Առաքելություն» կուսակցությունը, որի անունը հանրության լայն շրջանակներին ծանոթ չէ: Եվ սա բնական է, որովհետև կուսակցությունը պետական մարմնի կողմից գրանցվել է ընդամենը վերջերս` 2013թ-ի մարտի 4-ին, ըստ այդմ` ակտիվ հրապարակային գործունեություն չի ծավալել, չի հասցրել ընտրողներին ներկայացնել իր գաղափարախոսությունը, կոնկրետ անելիքներն ու ծրագրերը:

Միայն հայտնի է, որ կուսակցության փաստացի ղեկավարները` Մեսրոպ Առաքելյանն ու Մանուկ Սուքիասյանն, ակտիվ մասնակցություն են ունեցել Լևոն Տեր-Պետրոսյանի 2008-ին ծավալած համաժողովրդական շարժմանը, այնուհետև, ի թիվս այլոց, հավանաբար, հիասթափվել են առաջին նախագահի թիմից: Այս կուսակցության ծնունդը շատերը կապում են այս կամ անձի, իշխանության կամ ընդդիմության հետ: Ես հակված եմ մի կողմ դնել զանազան զրույցներն ու խոսակցությունները և գերադսում եմ մարդկանց մասին գնահատականներ հայտել նրանց գործունեության արդյունքում: Իսկ դրա համար` մի փոքր սպասել է պետք:

Երիտասարդների ցուցակ` առանց պահեստայինների

«Առաքելություն» կուսակցության նախընտրական ցուցակում ընդգրկված է 28 անուն: Երևանի ավագանիում անդամների թիվը 65-ն է, ըստ այդմ`նշենք, որ ընտրության մասնակից այս կուսակցությունն ի սկզբանե արձանագրում է, որ քաղաքապետական հավակնություններ չունի:

Ինչևէ, վերադառնանք ցուցակին և փաստենք, որ այն, բացառությամբ մեկ թեկնածուի, բաղկացած է բացառապես երիտասարդներից: «Առաքելության» կուսակցական բանկը, թերևս, առայժմ հարուստ չէ. ցուցակում ընդգրկված 28 անուններից միայն 16-ն է կուսակցական:

Ավագանու ընտրություններում «Առաքելության» ցուցակը գլխավորում է Մեսրոպ Առաքելյանը Նա ընդամենը 28 տարեկան է, սակայն տեսանելի հաջողությունների է հասել բանկային համակարգում: Նրան հաջորդում է Մանուկ Սուքիասյանը, ով քաղաքագետ է ու մեկ անգամ արդեն մասնակցել է ընտրություններին. 2007-ի ԱԺ ընտրություններում նա Նիկոլ Փաշինյանի ղեկավարած «Իմփիչմենտ» դաշինքի նախընտրական ցուցակում էր: Ցուցակի երրորդ հորիզոնականում Հրաչյա Սարգսյանն է` բանկային համակարգում Մ. Առաքելյանի գործընկերը (ի դեպ, այս կուսակցության ցուցակում քիչ չեն բանկա-վարկային ոլորտի աշխատողները, ինչը, թերևս պայմանավորված է հենց Մեսրոպի անձով):

«Առաքելություն» կուսակցության ղեկավարները հաճախ հանդես չեն եկել հրապարակային ելույթներով, սակայն նրանց մի քանի ելույթներում հնչել են կոնկրետ նախընտրական խոստումներ: Մասնավորապես, նրանք խոստանում են, ավագանիում ներկայացված լինելու դեպքում, հասնել մայրաքաղաքի բյուջեի կրկնապատկմանը, մետրոյով անվճար երթևեկությանն և այլն: Ի դեպ, կուսակցությունն ավագնու ընտրություններին մասնակցում է «Ապրում ենք Երևանում, ապրում եմք Երևանով» կարգախոսով:

Հավակնություններ և իրականություն

Իհարկե, ակնհայտ է, ար այս ընտրություններում «Առաքելություն» կուսակցությունը չի կարող հաղթահարել 6%-ի արգելքը: Դա են հուշում ոչ միայն սոցիոլոգիական հարցումները, այլ նաև` հայաստանյան իրականությունը. մեր տիպի բևեռացված քաղաքական համակարգերում հասարակությունն ընտրությունը կատարում է «սև-սպիտակ» սկզբունքով, իսկ «Առաքելությունը» նման խճանկարի մեջ չի տեղավորվում: Գոնե այսօր:

Երևանի ավագանու ընտրություններն «Առաքելություն» կուսակցության համար դառնալու են քաղաքական դրսևորման միջոց: Մնում է այդ դրսևորումը չասոցացվի պարտության և ձախողման հետ:

Սուրեն Սուրենյանց

ՀԳ. Ի  դեպ, վաղը` ապրիլի 8-ին, ժամը 12-ին, «Վարկած» մամուլի ակումբի հյուրերը «Առաքելություն» կուսակցության նախընտրական ցուցակի առաջատարներ Մեսրոպ Առաքելյանն ու Մանուկ Սուքիասյանն են: