Ապրիլի 7-ը Մայրության և գեղեցկության տոնն  է:

Ըստ քրիստոնեական տոնացույցի` ապրիլի 7-ին Մարիամ Աստվածածինը ավետիս է ստացել, որ լույս աշխարհ պիտի բերի Աստծո որդուն։

Գաբրիել հրեշտակապետը Սուրբ Մարիամին հայտնվում է այն ժամանակ, երբ նա կարդում էր Եսայու մարգարեության մի հատված, ուր խոսվում էր Կույսից Փրկչի ծննդյան մասին, և մտածում էր, թե ո՞վ է արդյոք լինելու այդ երանելի կույսը:
Հրեշտակը ողջունում է սրբ. Մարիամին և հայտնում. «Սուրբ Հոգին կգա քո վրա, և բարձրյալի զորությունը հովանի կլինի քեզ, որովհետև նա, որ քեզանից է ծնվելու, սուրբ է և Աստծու որդի կկոչվի»:

Մարիամը ստանալով երանելի ավետիսը, չէր կարող չկանխատեսել այն փորձությունները, որ կրելու է, նման մեծ առաքելություն իրականացնելիս, սակայն նա, իր արարքով մարդկությանն՝ աստվածային կամքին հնազանդության հրաշալի օրինակ ցույց տալով, ասաց. «Ահավասիկ ես մնում եմ Տիրոջ աղախինը, թող քո խոսքի համաձայն լինի ինձ»:

Եվ ըստ Սուրբ գրքի, Կույսի հղիությունը  սկսվեց հենց այն պահից, երբ նա արտաբերեց այս խոսքերը: