Սեքսապաթոլոգ դիմող կանանց գրեթե 55 տոկոսը տառապում է օրգազմի բացակայությամբ՝ անօրգազմիայով, որը կնոջ օրգանիզմի մշտական կամ պարբերաբար բացակայություն է. այս մասին այսօր լրագրողների հետ հանդիպման ժամանակ նշել է բժիշկ-սեքսապաթոլոգ Վրեժ Շահրամանյանը և հավելել, որ մյուս՝ հաճախ հանդիպող խանգարումը սեռական ցանկության բացակայությունը կամ նվազումն է:

«Կանանց շրջանում սեռական խանգարումներից են նաև սեռական նևրոզները, որոնց ժամանակ առաջանում են լարվածություն, գերնյարդային վիճակ, ամուսնական կոնֆլիկտներ, ինչի հետևանքով առաջանում է սեռական հարաբերությունից խուսափելու միտում, կանանց համար սեռական հարաբերությունը դառնում է ցավոտ»,-մանրամասնել է Վրեժ Շահրամանյանը:

Վերջինիս հավաստմամբ, օրգազմի տևական բացակայությունը կարող է բացասական ազդեցություն ունենալ կնոջ վրա, դառնալ մի շարք հիվանդությունների առաջացման պատճառ, ինչպես`  նևրոզներ, շաքարային դիաբետ և այլն:

Նրա խոսքով, թեև կանանց սեռականությունը ստվերված է, հստակ վիճակագրություն  չկա, սակայն Հայաստանում սեռական խանգարումների թիվը կրկնակի աճել է:

«Կանանց սեռական խանգարումների պատճառները շատ են` սկսած ամուսնու կոպիտ վերաբերմունքից վերջացրած սեռական սխալ դաստիարակությամբ, ինչի արդյունքում աղջկա մոտ ձևավորվում են սխալ պատկերացումներ սեռական կյանքի ու հարաբերությունների վերաբերյալ՝ կապված մի շարք ընտանեկան օրինակների հետ»,-ընդգծել  է սեքսապաթոլոգ:

Վրեժ Շահրամանյանի տեղեկացմամբ, այցելուների մոտ 25 տոկոսը կանայք են, 25 տոկոսը`  ամուսնական զույգեր, իսկ 50 տոկոսը` տղամարդիկ: