Միացեք մեր ազգային միասնականությանը, որովհետև մեր դեմ խաղ չկա.  մենք ապրում ենք մեր կյանքի ամենապատասխանատու մեկ շաբաթը. այսօր Գյումրիի թատերական հրապարակում, գյումրեցիների հետ հանդիպման ժամանակ ասել է «Ժառանգություն» կուսակցության առաջնորդ Րաֆֆի Հովհաննիսյանը:
«Մտածեք տղերք, պարոն Սարգսյան, մի շաբաթ մնաց, ազգային միասնության մասնակից եղեք, որովհետև ժողովուրդը պահանջում է գնալ առաջ իր իրավունքի գնահատականով:

Այսօր փետրվարի 18-ի մեր հաղթանակով ենք եկել, հավաստագրելու բարևի, արևի, լույսի մեր բանակը, որը տարել է հաղթանակը խաղաղ, հարգանքով և սահմանադրական կարգով։ Հավատացեք, որ այդ պայքարը շարունակվելու է մինչև մեր երազանքների իրականացում։ Սա ոչ թե Րաֆֆու հաղթանակն էր և Սերժի պարտությունը, այլ ժողովրդի, մեր երեխաների ապագայի հաղթանակը, որն ամրագրելու ենք ապրիլի 9-ին միասին»,- իր խոսքում նշել է Րաֆֆի Հովհաննիսյանը, և հավելել, որ քանի դեռ ինքը ողջ է, իր կաթիլ զոհողությունը դնելու է սեղանի վրա։

«Մենք ոչ թե հոտ ենք, որ մեզ հաշվեն՝ մենք մի միասնական ազգ ենք, միասին տանելու ենք այդ միասնականությունը մինչև ապրիլի 9-ը։ Ժամանակն է եկել խոսքից անցնել գործի, իրար միացած, բռունցք դարձած գործ պետք է անենք, դա միայն իմ պարտականությունը չէ, դա բոլորիս պարտականությունն է, միասին անելու ենք դա առանց կամ-ի»,-ընդգծել է նա:

Ժառանգության առաջնորդն, անդրադառնալով Պռոշյանի գյուղապետ Հրաչ Մուրադյանի սպանությանը, նկատել է, որ այսօր հայ ժողովուրդը կորցրեց նվիրական ազատամարտիկ, նվիրական քաղաքացու, Պռոշյանի դաշնակցական համայնքապետին: «Սպանեցին նրան վախկոտները օրը ցերեկով: Մենք պահանջում ենք, որ գործող դե ֆակտո իշխանությունները բացահայտեն այս քստմնելի հանցագործությունը»։