Ասում է ՀՀԿ-ական պատգամավորը

Անկախ այն իրողությունից, թե երբ կավարտվի Րաֆֆի Հովհաննիսյանի  բարևա-բարլուսախառը  արշավը  ՀՀ իշխանությունների  ու գործող ռեժիմի դեմ, և ի՞նչ ընթացք  ու տրամաբանություն կունենա ՀՀ նախագահ Սերժ Սարգսյանի ապրիլյան   ինագուրացիան,  պորտֆելաբաժանության գործընթացը  ոչ մի կերպ հանգիստ չի տալիս՝ ոչ տեղական իշխանիկներին , ոչ էլ օրենսդիր մարմնի ներկայացուցիչներին:

Այս օրերին,  բոլոր հնարավոր միջոցներով իր մարզպետության հարցն է փորձում լուծել ԱԺ  ՀՀԿ-ական պատգամավոր Մուրադ Մուրադյանը, որը  լծվել է Արարատյան դաշտավայրում լուրջ հողակտորներ ձեռք գցելու  գործին:

Բացի այն, որ  Մուրադյանը  «խցկվել»  է ձկնաբուծության բիզնեսի մեջ, հիմա  էլ փորձում է  նոր գազալցակայան  ձեռք գցելու հարցը լուծել, ինչը, մեր մեջ ասած,  կարծես թե, նրան չի հաջողվում: Զարմանալի է, որ մինչ օրս Մուրադյանը տեղյակ չէ, թե  գազալցակայանների  մենաշնորհն այդ մարզում  ում է պատկանում…

Ինչևէ, թե  ի՞նչ հույսերով է ՀՀԿ-ական Մ. Մուրադյանը  միանգամից  ուզում և մարզային իշխանությունը վերցնել, և   Հ. Աբրահամյանի բիզնես տիրույթ մուտք գործել, «Հայկական Վարկած»-ը  փորձեց պարզաբանումներ ստանալ հենց պատգամավորից:

-Պրն Մուրադյան, ո՞ւմ հույսով եք պատրաստվում Արարատի մարզպետ դառնալ:  Ասում են, Ձեր այդ ցանկությունների մասին   խոսել եք նաև ՀՀ վարչապետ Տիգրան Սարգսյանի հետ:

-Ո՞վ ե՞ս, այ մարդ, հո դուք խաթա չեք, ես ի՞նչ կարամ խոսամ: Ես տենց բաներ չգիտեմ:

-Բա ի՞նչ գիտեք: Միայն այն, որ Ձեզ այդ պաշտոնն են խոստացել;

-Ո՞նց,  դուք էդ մասին բաներ  գիտեք:

-Այսինքն՝ չեք թաքցնում, որ այդ թեմայի շուրջ, այնուամենայնիվ, խոսակցություն եղել է:

— Այ, բալամ, տենց բան չկա, ես ինչ իմանամ ինչ կլինի: Տենց  հարց  հլը չկա:

-Բայց կարո՞ղ  է լինել:

-Դե հիմի: Ինձ ոչ մեկ բան չի ասել:

-Իսկ կուզենայի՞ք, որ ասեին, կամ այլ կերպ ասած, ուզում եք  դառնալ Արարատի մարզպետ, թե ոչ:

-Դե իմ ցանկությունների մասին չէի ուզենա խոսել:

-Լավ, հաջորդ ցանկություն մասին խոսենք . ասում են, Արարատի մարզում ուզում եք նոր գազի լիցքավորման կայան կառուցել: Իսկ  ամոթ չլինի հարցնելը այնտեղ ազատ տարածք  մնացե՞լ է:

-Դե կըլնի էլի, բայց ես տենց բան չեմ անում:

-Ինչո՞ւ,  Հովիկ Աբրահամյանը  թույլ չի տալի՞ս:

— Էս էլ էն ֆաքսի պատմությունը եղավ: Ես ոչ այդքան գումարներ  ունեմ, ոչ էլ մտադրություն, որպեսզի տենց բիզնես անեմ:

— Փաստորեն նախարար  աշխատած տարիներին չեք կարողացել լավ «վաստակել» , որպեսզի այսօր գումարի հետ կապված խնդիրներ չունենայիք:

-Ես հասկանում եմ  ձեր տողատակերը, բայց  ես ազնիվ պաշտոնյա եմ եղել, ու սովորական   ապրող մարդ եմ մինչ էսօր:

-Բա որ ազնիվ ու սովորական եք եղել, ինչպես ստացվեց, որ որոշեցիք ՀԷԿ-էլ կառուցել, այսօր ոչ մի սովորական մարդ չի  կարող նման բաների մասին մտածել:
-Դե  ես էլ չեմ մտածում, ինձ էդքան փող որտեղի՞ց, որ ես նման բան կառուցեմ:

-Դե գուցե գործի հետևում այլոք են կանգնած ուղղակի դուք պետք է լինեք գլխավոր դերում: Մեր երկրի խաղի կանոններին ծանոթ չե՞ք, ինչ է:

-Ես ավելի լավ ա արդեն գնամ, թե չէ շատ բան կբացվի ու լավ չի ստացվի, դուք ոնց որ ուզում եք իմ գլխին մի «օյին» բերել:

Ա. Սուլթանյան

Հ.Գ. Ի դեպ այս «բլիցը» լրիվ տեղավորվում է մեր հրապարակած՝ «Պատգամավորաորսը շարունակվելու է» թեմայի շրջանակներում

Պատգամավորաորսը շարունակվելու է | Arm Version: