Քիչ առաջ դանակով զինված անհայտ մի քաղաքացի փորձ է արել մուտք գործել Ազգային Ժողովի ընդունարան: Նրա մուտքը խոչընդոտելու նպատակով ԱԺ տարածքը հսկող ոստիկանների կողմից հրազեն է գործածվել: Ականատեսների վկայությամբ, հնչել է երկու կրակոց:  Դանակով զինված անձը փորձել է դիմել փախուստի, սակայն ոստիկաններից մեկը հասցրել է նրան վիրավորել: Այս պահին ԱԺ մուտքի մոտ շտապօգնության մեքենա է կայանված և փորձում են վիրավորին հիվանդանոց տեղափոխել: Ոստիկանները հրաժարվում են որևէ տեղեկություն տրամադրել, իսկ ԱԺ լրատվական ծառայությունն անտեղյակ է միջադեպից, այս մասին հայտնում է Հրապարակը:

————

ԱԺ լրատվության բաժնից հայտնում են,որ  դանակով զինված մի երիտասարդ մուտք է գործել ԱԺ բակ:   Զինված քաղաքացին հարցին, թե ով է ինքը, պատասխանել է՝ Հիսուս Քրիստոսը:

Եղել է 2 կրակոց։ Երիտասարդը չի ենթարկվել անվտանգության աշխատակիցների հրահանգներին։ Անվտանգության աշխատակիցները կրակել են օդ, եղել է նաև երկրորդ կրակոց, որն ուղղված է եղել երիտասարդի ոտքին, քանի որ վերջինս շարունակել է առաջ շարժվել։

——

Մեր ունեցած տեղկությունների համաձայն, Ազգային ժողովի տարածք մտած երիտասարդը Արարատի մարզի Մասիս քաղաքի բնակիչ, 25-ամյա Վրեժ Գալստյանն է:

Վերջինս ունի հոգեկան շեղումներ, իսկ նախկինում 2 անգամ դատված է եղել:

Նրա մասին առավել մանրամասն տեղեկություններ, հավանաբար, ավելի ուշ կհայտնի ՀՔԾ-ն: