Մեր գործընկեր՝ Սիսիանի «Որոտան» թերթի խմբագիր Արևհատ Ամիրյանի և տեղի բնապահպանության վարչության պետ Սամվել Թանգյանի միջև ծագած հակասությունները  (հիշեցնենք, որ«Որոտան»  թերթում  տպագրված «Անհայրենիք հայի այս տեսակը, կամ` Գալիս է հոտը» վերնագրով հոդվածում  Սյունիքի մարզպետարանի բնապահպանության և գյուղվարչության պետին, «դուր չի եկել» իր վերաբերյալ ասվածը և նա, հոդվածագրին՝ Արևհատ Ամիրյանին, հեռախոսով սպառնացել է՝   նրան վերացնել  և նրա ընտանիքը ոչնչացնել) տեղափոխվել է իրավական դաշտ. այս մասին առավել ստույգ աղբյուրից տեղեկանալու համար, դիմեցինք ՀՀ ոստիկանությանը, որտեղից սահմանաված ժամկետում ստացանք պատասխան.

Ձեր հարցմանն ի պատասխան` հայտնում ենք, որ 2013 թ.  մարտի 1-ին Սյունիքի մարզպետարանի  գյուղատնտեսության և բնապահպանության վարչության պետ Սամվել Թանգյանը  դիմել էր ոստիկանության Սիսիանի բաժին և հայտնել, որ «Որոտան» թերթի խմբագիր Արևհատ Ամիրյանը նույն թերթի 2013 թ. փետրվարի 26-ի համարում  տպագրած հոդվածով վիրավորել է իրեն, փորձել հեղինակազրկել և մեղադրել է ինչ-որ «մութ գործարքների» մեջ մտնելու համար:

Դիմումի կապակցությամբ ոստիկանության Սիսիանի բաժնում նախապատրաստվել են նյութեր և մարտի 4-ին եզրակացությամբ կցվել են շարք` թողնվելով անհետևանք:

Համաձայն ՀՀ քրեական դատավարության օրենսգրքի 57 հոդվածի՝ նյութերի նախապատրաստման ընթացքում հետաքննության մարմնի աշխատակիցը մինչև քրեական գործ հարուցելն իր լիազորությունների շրջանակում իրավասու է կատարված հանցագործությունը և կատարող անձին բացահայտելու նպատակով հանցագործության մասին հաղորդում տված անձից և դեպքի հանգամանքների մասին տեղեկություններ ունեցող այլ անձանցից բացատրություններ վերցնել, որոնք կարող են նշանակություն ունենալ նյութերի ընթացքը ճիշտ լուծելու համար, իսկ ըստ ՀՀ քրեական դատավարության օրենսգրքի 6-րդ հոդվածի 35-րդ կետի` բացատրությունները, որոնք իրենց դերն ու նշանակությունն ունեն նյութերի նախապատրաստման ընթացքում, բանավոր կամ գրավոր փաստարկումներն են, որոնք բերում են դիմողները՝ հիմնավորելու համար իրենց կամ ներկայացող անձի պահանջները, ինչպես նաև այլ անձանց բանավոր և գրավոր հաղորդումներն են, որոնք տրվում են մինչև քրեական գործ հարուցելը:

ՀՀ ոստիկանության պետի հրամանով սահմանված կարգով ՀՀ ոստիկանությունում ստացված դիմումները, բողոքները հաշվառվում են ՀՀ ոստիկանության ստորաբաժանումներում՝ դիմումների, բողոքների հաշվառման մատյանում, այնուհետև ստորաբաժանման ղեկավարի կողմից հանձնվում են կատարման` նախապատրաստվում են նյութեր, ստուգվում դրանցում նշված տեղեկությունները, ինչի ընթացքում էլ հետաքննության մարմնի աշխատակիցը, ղեկավարվելով վերը նշված օրենքներով, իր լիազորությունների շրջանակում կարող է վերցնել բացատրություններ, ձեռնարկել քրեադատավարական այլ միջոցառումներ:

Վիրավորանքը որպես հանցագործություն ապաքրեականացնելու մասին ՀՀ ոստիկանությունն իհարկե քաջատեղյակ է, սակայն Սամվել Թանգյանն իր դիմումում, բացի Արևհատ Ամիրյանի կողմից իրեն վիրավորելու փաստից, նշել է նաև, որ նա իրեն, որպես պաշտոնյայի, մեղադրել է ինչ-որ «մութ գործարքների» մեջ մտնելու համար, ինչի մասին նշված է նաև «Որոտան» թերթի 26.02.2013 թ. համարում, և Սամվել Թանգյանի կողմից ինչ-որ մութ գործարքների մեջ մտնելու հանգամանքը ստուգման կարիք է ունեցել:

Ոստիկանությունում Սամվել Թանգյանի 01.03.2013թ. դիմումում նշված փաստերն ուսումնասիրելուց և բացատրություններ վերցնելուց հետո է պարզվել, որ դիմումում նշված պահանջը կրել է բացառապես  քաղաքացիաիրավական բնույթ և կարող էր բավարարվել դատական կարգով, ինչի մասին էլ գրավոր պատասխանվել է դիմումատու Ա. Թանգյանին:

Ձեր հարցման 4-րդ կետին ի պատասխան` տեղեկացնենք, որ  ոստիկանության Սիսիանի բաժնի պետը վարձով բնակվում է Սիսիանի Իսրայել Օրի փողոցում գտնվող  բազմաբնակարան շենքում (շենքի լուսանկարները կցվում են):

2013 թ. մարտի 11-ին Սյունիքի մարզի դատախազությունից ոստիկանության Սյունիքի մարզային վարչություն է ստացվել  «Որոտան» թերթի խմբագիր Արևհատ Ամիրյանի դիմումն այն մասին, որ  2013 թ. փետրվարի 28-ին, ժամը 16.00-ի սահմաններում, Սյունիքի մարզպետարանի  գյուղատնտեսության և բնապահպանության վարչության պետ Սամվել Թանգյանը «Որոտան» թերթում տպագրված հոդվածի կապակցությամբ հեռախոսով սպառնացել է վերացնել իրեն և ոչնչացնել ընտանիքի անդամներին:

Ոստիկանության Սյունիքի մարզային վարչությունում այժմ նախապատրաստվում են նյութեր:
 Հ.Գ. Ինչ խոսք, իրոք, հանգամանալի է ներկայացված իրավիճակը. անգամ լուսանկարներ են տրամադրել մեզ, սակայն  ոստիկանությունը տեղյակ չէ, որ շենքը, որի լուսանկարները կցվել է պատասխանին, իրոք, մեր նշած տունն է, և այն պատկանում է Սիսիանի քաղաքապետ Աղասի Հակոբջանյանին, սակայն  դա ոչ թե բազմաբնակարան շենք է, այլ տուն, որտեղ ապրում են երկու ընտանիք, որոնցից մեկը հենց Սիսիանի ոտիկանապետինն է: Ոստիկանությանը պատիվ չի բերում նման անտեղյակությունը: