Այսօր Ազգային ժողովում,  Կառավարության հետ հարց ու պատասխանի ժամանակ «Ժառանգություն» խմբակցության քարտուղար Զարուհի Փոստանջյանը, հիշեցնելով, որ ուրբաթ օրը Ազատության հրապարակում կայանալու է ժողովրդի «հաղթահավաքը»,  հարցով դիմել է ՀՀ վարչապետ Տիգրան Սարգսյանին:

«Չեմ ցանկանում մտածել, որ Դուք անմասն կմնաք հայկական մեծ հեղափոխությունից: Կարծում եմ՝ Ձեր մեջ չի մարել հեղափոխական լինելու ցանկությունը, սակայն հաշվի առնելով այն հանգամանքը, որ դեռ բացակայում եք ժողովրդի իշխանությունը բանեցնելու և իրացնելու վայրերից, ՀՀ քաղաքների և գյուղերի հրապարակներից, և Ձեր կարծիքը միանշանակ չեք հայտնել Բաղրամյան 26-ի բանտախցում գտնվող Սերժ Սարգսյանի վերաբերյալ, ամսի 22-ին՝ ուրբաթ օրը՝ երեկոյան ժամը 6-ին Ազատության հրապարակում տեղի է ունենալու հայ ժողովրդի հաղթական հավաքը, և ցանկանում եմ պարզել՝ Դուք մասնակցելո՞ւ եք տեղի ունենալիք հաղթահավաքին»:

ԱԺ նախագահ Հովիկ Աբրահամյանը  մի կերպ զսպելով ծիծաղը, առաջարկել է վարչապետին պատասխանել հարցին:

Տիգրան Սարգսյանը, շփոթված ասել է, որ այդ հաղթահավաքին չի մասնակցելու, քանի որ իր աշխատանքային օրակարգն այլ կարևորագույն միջոցառումներով է լեցուն:

«Ուզում եմ պատասխանել Ձեզ, որ համաձայն չեմ Ձեր գնահատականների հետ և Ձեր հնչեցրած մեղադրանքների հետ, որովհետև Դուք քաղաքական բանավեճը տեղափոխում եք վիրավորանքների դաշտ, ինչը, կարծում եմ, տեղին չէ, և այս հեղինակավոր դահլիճը չի կարելի նման՝ վիրավորանքներով լի ոճի վերածել: Դա վատ ճանապարհ է և շատ վատ տեղ է տանում: Դրա համար առաջարկում եմ, որ մենք, այնուամենայնիվ, մնանք քաղաքակիրթ երկխոսության շրջանակներում»,-ասել է վարչապետը: