Ֆերնանդո Բուրբոնը պատկանում է ամենահին թագավորական տներից մեկի՝ Բուրբոնների արքայական ընտանիքին: Սակայն անձամբ Ֆերնանդոն, ով այժմ Կոստա Ռիկայի դեսպանն է, այնքան էլ չի սիրում խոսել, պատմել այդ մասին, թեև խոստովանում է, որ թագավորական ընտանիքից սերումը շատ դռներ է բացում իր առջև: Այն, ինչի մասին այս անձնավորությունն առավել շատ է սիրում խոսել Հիսուս Քրիստոս է և Նրա անսահման ողորմությունը, ինչպես նաև այն, թե ինչպես է իրեն հաջողվել Քրիստոսին քարոզել ազնվական այրերին ու նախագահներին:

«Ես Կոստա Ռիկայի դեսպանն եմ, ինչպես նաև Հիսուս Քրիստոսի դեսպանը՝ Նրա անսահման ողորմությամբ,- պատմում է Ֆերնանդոն:- Տարիներ առաջ ներկա էինք մի մամլո ասուլիսի, ուր քաղաքական գործիչներ ու բազմաթիվ լրագրողներ կային: Հանկարծ վերջիններից մեկն ասաց. «Պարո՛ն նախագահ, իսկ Դուք գիտե՞ք, որ Ֆերնանդո Բուրբոնն իրականում ձեր դեսպանը չէ…»: Նախագահը նայեց ինձ ու հարցրեց. «Դա ի՞նչ է նշանակում»: Լրագրողը շարունակեց. «Ֆերնանդոն հայտարարել է, որ Հիսուս Քրիստոսի դեսպանն է»: Այդ պահին նախագահը շրջվեց լրագրողի կողմը և ասաց. «Ամեն բան ճի՛շտ է, Ֆերնանդոն գիտի՝ ով է այստեղ գլխավորը»»:

Ֆերնանդոն իր պաշտոնում տեսնում է ավելին, քան պարզապես աշխատանք. գրում է Christian Telegraph-ը: Այս բարձր դիրքը նա համարում է իր ծառայությունը: Եվ որպես ծառայող, նրան հրավիրում են տարբեր եկեղեցիներում քարոզելու: Բացի դրանից, սակայն, նա փորձում է ավետարանել նաև շատ այլ վայրերում:

«Որ երկրում էլ գտնվեմ, որ եկեղեցում էլ գտնվեմ, միշտ խնդրում եմ մարդկանց աղոթել իրենց նախագահի համար,- խոստովանում է Բուրբոնը,- Կարծում եմ, որ պետք է աղոթենք և՛ իշխանությունների, և՛ հասարակ քաղաքացիների համար… Հարավային Կորեայի նախագահի հետ երբեք քաղաքականության մասին չենք խոսել. միայն՝ Աստծո: Երբ 2007թ-ին նա ընտրվեց նախագահի պաշտոնում, բոլոր դեսպանները սպասում էին, որպեսզի շնորհավորեն նրան: Երբ հերթն ինձ հասավ, ես ասացի նրան. «Պարո՛ն Լի, գիտե՞ք՝ ինչու հենց դուք դարձաք նախագահ. որովհետև Աստված էր դա ցանկանում»: Այդ պահին նրա կինը նայեց ինձ և երկու անգամ կրկնեց. «Ամեն»»:

Ֆերնանդոն համոզված է, որ մերօրյա շատ եկեղեցիների ու քրիստոնյաների անհրաժեշտ է ավելի շատ սրբություն: Նա նշում է, որ մարդիկ, ոչ միայն աշխարհում, այլ նաև եկեղեցիներում մեծապես ունեն Աստծո արդարության և Նրա Խոսքին համաձայն քայլելու կարիք: «Շատ եկեղեցիներում եմ եղել,- ասում է Ֆերնանդոն,- և ամենից կարևոր համարում եմ Ավետարանի սրբությունը:

Վերջերս Գվատեմալայում էի, ինչպես նաև Սալվադորում և Մեքսիկայում՝ հովիվների հանդիպմանը: Այնտեղ նրանք խնդրեցին ինձ պատմել «խաչի ուղերձի» մասին: Ուզում եմ ասել, որ սա այն է, ինչ հետաքրքրում է բոլորին: Եկեղեցու առաքելությունն է՝ սրբության Ավետարանը տանել բոլոր ազգերին»: