Այս օրերին, «Հայկական Վարկած»-ը քաղաքացիներից բազմաթիվ բողոքներ է ստացել կապված  բանկոմատների աշխատանքի և պլաստիկ քարտերի սպասարկման որակի հետ:

Քաղաքացիները դժգոհում են, պատմելով, որ բանկոմատից քարտով գումար հանելիս, էկրանին ցույց է տալիս, որ գործարքը չի կատարվում,  բայց իրականում հաշվից հանվում է գումարը, սակայն քաղաքացին չի տեսնում դա: Ստացվում է, որ եթե  հաճախորդը հետևողական չլինի, գումարը «կնվիրաբերվի» բանկին:

Մեզ դիմած քաղաքացիներն ասում են, որ պետք է աչալուրջ լինես, որ եթե մի քանի անգամ ես փորձել, ասենք, տարբեր գումարներ հանել ու չի ստացվել, հաշվես դրանք, քանի որ համակարգի խնդրի պատճառով առաջացած խառնաշփոթում՝ կարող ես աննկատ  գումար կորցնել:

Մեզ դիմած մարդիկ հատկապես դժգոհում են, թե բանկերը չեն զգուշացնում, որ համակարգը խնդիր ունի, այսինքն, ստացվում է՝ ով կնկատի, կնկատի, ով չէ՝ կտուժի:

Բանկերն, ընդ որում, խոսքը գրեթե բոլոր բանկերի մասին է, հավաստիացրել էին, որ եղածը տեխնիկական խափանումներ են, կամ նոր ծրագրային ապահովման անցման գործընթացի հետ է կապված, և խոստացել էին մինչև փետրվարի 17-ը վերացնել  (ուշագրավ է նաև ամսաթիվը՝ նախագահական ընտրությունների նախաշեմին):

«Հայկական Վարկած»-ը փորձեց պարզաբանում ստանալ բանկերից՝ որպես հաճախորդ: Գրեթե բոլոր բանկերը նույն պատասխանը տվեցին. «Եթե մեր հաճախորդն եք, եկեք մեզ մոտ, քարտի թվերն ասեք, կտեսնենք ինչ խնդիր է, կամ դիմում գրեք և ձեր գումարը կվերադարձնենք»:

Իսկ այն հարցին, թե՝  քաղաքացու համար ստեղծվում է տհաճ իրավիճակ, նա կորցնում է նյարդեր ու ժամանակ, բայցի դա ինչո՞ւ չեն նախազգուշացնում հաճախորդներին, որ անգամ անհաջող գործարքի դեպքում, իրենց հաշվից գումարը նվազում է, ասացին. «Դա ընդհանուր բանկային համակարգ է. հնարավոր է նաև, որ համակարգը, որոշ ժամանակ անց, ինքնիրեն վերականգնի սխալը»: