«Մեդիա կենտրոն»- ը հաղորդագրություն է տարածել, որում  ասվում է.

«Լոռիի մարզի Տաշիր քաղաքի 35/5 ընտրատեղամասից ահազանգ է ստացվել առ այն, որ լցոնում է տեղի ունեցել: Ընտրատեսամասի հանձնաժողովի «Ժառանգության» անդամ Պալուցյան Մարիամը ահազանգել է, որ լցոնման երկու փորձ է իրականացվել, որից մեկը հաջողվել է և մոտ երեք ընտրաթերթիկ գցվել է քվեատուփի մեջ, իսկ երկրորդ փորձը կանխվել է ընտրատեղամասի հանձնաժողովի նախագահի կողմից:

«Այս խախտումն արձանագրվեց, սակայն ոչ ճշգրիտ, գրանցամատյանում գրվել է, որ փորձ է միայն կատարվել, սակայն արդեն իսկ իրականացված փաստը չի արձանագրվել, յոթ հոգով համոզում են հանձնաժողովի անդամ Մարիամ Պալուցյանին ու ճնշում են գործադրում, որ փաստը չարձանագրվի»,- «Մեդիա Կենտրոնին» հայտնում է նույն ընտրատեղամասում Րաֆֆի Հովհաննիսյանի վստահված անձ Գևորգ Քոթանջյանը:

Կոտայքի մարզի Աբովյան քաղաքի 28/23 ընտրական տեղամասում հանձնաժողովը իր գործունեությունը սկսել է օրենքով նախատեսված ժամից` 07:00-ից  ուշ: Ըստ այդ տեղամասում դիտորդական առաքելություն իրականցնող «Կարողություն և զարգացում հանուն  քաղաքացիական հասարակության» հ/կ նախագահ Լուսինե Սիմոնյանի,  տեխնիկական պատճառով տեղամասի դուռը դժվարությամբ են բացել: Հանձնաժողովը քվեարկության  նախապատրաստական աշխատանքները սկսել է մոտ 20 րոպե ուշացումով: Քվեարկությունը սակայն սկսվել է ժամանակին:

Սիմոնյանը հայտնում է, որ նույն տեղամասում հանձնաժողովն իրականացրել է 1 վիճակահանություն, այնինչ պետք է իրականացներ 6-ը, որպեսզի պարզեր  հանձնաժողովի անդամների  տեղն ու ֆունկցիաները օրվա տարբեր ժամերին:

6 –ի փոխարեն 1 վիճակահանություն է իրականացվել նաև 28/22 տեղամասում:

Արդյոք կանցկացվի կրկնակի վիճակահանություն` պարզ կլինի օրվա ընթացքում»: