Քարոզարշավի վերջին օրը ՀՀ նախագահի թեկնածու Սերժ Սարգսյանի Սիսիանի շրջանում գտնվող ենթաշտաբերում կրքերն էլ ավելի են թեժացել:

Պարզվում է, քարոզարշավ ասելով, ենթաշտաբի պետերը հասկացել են այն, ինչ իրենց հրահանգված է մարզպետի մակարդակով:

Ըստ մեր ունեցած լուրերի, ենթաշտաբի պետերը, տարածաշրջանի գյուղերից, ծանոթ-բարեկամ ընտրողներին իրենց տեղամասերի լրացուցիչ ցուցակներում գրանցելու ծանր աշատանքին են լծված:

Մասնավորապես, մեծ թիվ են կազմել Սիսիանի թիվ 4 ընտրատեղամասում, որտեղ ենթաշտաբի պետն է Աշոտ Մինասյանը: Այստեղ գրանցվել են երկրապահի անդամներ տարբեր գյուղերից: Նույն վիճակն է թիվ 6՝  Գայի տեղամասում, որտեղ ենթաշտաբի պետն է Սիսիանի քաղաքապետը:

Ըստ Սիսիանում շրջանառվող հավաստի լուրերի, քանի որ «Ժառանգություն» կուսակցության հանձնաժողովի պատասխանատուն Աշոտ Մինասյանի մերձավորի՝ Աշոտ Հովհաննիսյանի բարեկամն է՝ Ռուդիկ Հովհաննիսյանը, իսկ նրա եղբայրը քաղաքապետարանի իրավաբանն է, խոսակցություներ կան, որ արդեն իսկ պլանավորված է հանձնաժողովներում կեղծիքների մեխանիզմներ կիրառել, որոնց վրա, իհարկե, «Ժառանգությունն» աչք է փակելու:

Շատ հետաքրքիր է քարոզարշավի վերջին օրը. ոչ միայն Սիսիանում, այլև գյուղական համայնքներում  կազմակերպվել են ճաշկերույթներ ընտրողների համար: Առայժմ հրահանգված է ընտրակաշառք չբաժանել և փորձել հարցը լուծել ճաշկերույթների մակարդակով:

Վաղն արդեն պարզ կլինի, թե այս տարբերակը կաշխատի, թե ոչ: Հակառակ դեպքում, Լիսկան և իր դրածոները մարտական են տրամադրված, և, մեզ հասած լուրերի, ընտրակաշառք լինելու է:

Ավետիս Գրիգորյան