Օրեր առաջ Սիսիանում էր ՀՀ պաշտպանության նախարար Սեյրան Օհանյանը: Նրան ուղեկցում էին Սյունիքի մարզպետը, ԵԿՄ փոխնախագահներ և գեներալներ: Նախարարը եղավ զորամասերում, այնուհետև մասնակցեց Հայոց բանակին նվիրված միջոցառմանը:

Միջոցառման ժամանակ ՀՀ ՊՆ, ԵԿՄ և Սյունիքի մարզպետարանը պարգևներ և դիպլոմներ հանձնեցին ազատամարտիկներին և որոշ պետական պաշտոնյաների:

Երկրապահ կամավորականների միության մեդալով պարգևատրվեց նաև Սիսիանի քաղաքապետ Աղասի Հակոբջանյանը: Այս հանգամանքը մեծ տարակուսանք առաջացրեց սիսիանցի ազատամարտիկների շրջանում, քանի որ բոլորն էլ հիշում են, թե ինչպես 90-ականներին Աղասի Հակոբջանյանը զորակայանի ցանկապատից ցատկելով փախավ զորակոչից և որոշ ժամանակ թաքնվեց Ռուսաստանում:

Դեպքերի հաջող դասավորմամբ Աղասու քենակալը նշանակվեց Սիսիանի միլպետ, ինչն էլ նպաստեց նրա անվտանգ վերադարձին: Աղասին էությամբ պաշտոնատենչ անձնավորություն է և պաշտոնի հասնելու համար միջոցների միջև խտրականություն չի դնում:

2008թ. մարտի 1-ի ցույցերին մասնակցելու մեջ կասկածվող, արդեն նախկին միլպետ-քենակալին մատնելով` Աղասին իր համար ճանապարհ բացեց դեպի Սիսիանի քաղաքապետի բաղձալի պաշտոնը:

Այն ժամանակ, երբ սիսիանցի ազատամարտիկները կռվում էին թշնամու դեմ, Աղասին, ով կապի հանգույցի տնօրենն էր, օգտագործելով պետական միջոցները ակտիվորեն լծվել էր ազատագրված տարածքների թալանին: Եվ հիմա սիսիանցիները տարակուսում են. այդ ինչպե՞ս է, որ ԵԿՄ նախագահ Մանվել Գրիգորյանը պարգևատրում է թալանչուն և դասալիքին:

«Մենք վստահ ենք, որ ԵԿՄ նախագահ Մանվել Գրիգորյանը տեղյակ չի եղել Աղասու դասալքության փաստի մասին, թե չէ նման բան չէր անի: Հիշում ենք, 2009թ. էլ ԵԿՄ Սիսիանի վարչությունն էր Աղասուն դարձրել վարչության անդամ, սակայն ի պատիվ ԵԿՄ կենտրոնական վարչության, այդ աբսուրդ որոշումը չեղյալ համարվեց: Մենք երկրապահներս չենք ուզում, որ ԵԿՄ մեդալը և մենք կրենք, և դասալիքը կրի: Վստահ ենք, որ գեներալ Մանվել Գրիգորյանը կարձագանքի բացասական հետևանքներով հղի այդ երևույթին»,- մեզ հետ զրույցում կարծիք հայտնեցին սիսիանցի ազատամարտիկները:

Մերի Սահակյան

ԵՊՀ ուսանողուհի