Գեղարքունիքի մարզի Վարդենիս քաղաքում արտառոց դեպք է գրանցվել: «Ժողովուրդ»-ին հաջողվել է պարզել, որ դեռևս անհայտ անձինք Վարդենիսի 48-ամյա բնակիչ Նվեր Երանոսյանի վրա բենզին են լցրել, այրել ու թողել մեքենայի մեջ: Մահացածի հարազատները երեկ ահաբեկված էի` նշելով, որ նրան այրված են գտել: Իսկ ոստիկանության տեղեկացմամբ` փետրվարի 7-ին` ժամը 22:00-ի սահմաններում, Վարդենիսի բնակիչ Սարգիս Սարգսյանը (Մարտիկ Սահակյանի, Արսեն Նալբանդյանի ու Նվեր Երանոսյանի հետ) «Օփել» մակնիշի ավտոմեքենայով երթևեկել է Վարդենիս-Սոթք ավտոճանապարհով: Բենզինը վերջացել է, և Երանոսյանը բեռնախցիկից բենզին է հանել ու փորձել լցնել բենզաբակը: Սակայն ձագարը շուռ է եկել և լցվել Երանոսյանի վրա, որի մոտ վառվող ծխախոտ է եղել, ինչից էլ հրդեհ է առաջացել: Ընկերները փորձել են ձեռքերով հանգցնել, սակայն չի ստացվել: Երանոսյանը այրվածքներից մահացել է, իսկ մյուսները ստացել են տարբեր վնասվածքներ: Մինչդեռ Երանոսյանի հարազատները պնդում են, որ այդ «Օփել»-ը վաղուց բենզինով չի աշխատում:

Ժողովուրդ