Նախագահի թեկնածու Արամ Հարությունյանը հայտարարել է, որ վաղը՝ փետրվարի 7-ին,  ժամը 17:00-ին հացադուլ է անելու Կենտրոնական ընտրական հանձնաժողովի առաջ, նստելու է մինչև փետրվարի 8-ը ժամը 17.00-ը և հենց այդ ժամանակ էլ հանելու է իր թեկնածությունը:

Նա դեռ օրեր առաջ, մինչ Հայրիկյանի հետ կապված դեպքերը, «Հայկական Վարկած»-ի  հետ զրույցում ասել էր, որ պատրաստվում է այդ մեկ օրն ուղղակի նստել աստիճաններին: Մեր հարցին, թե՝ հացադո՞ւլ է անելու, նա ասաց թե՝ «Չէ, ուղղակի նստելու եմ, այդ մեկ օրը անցկացնելու եմ այնտեղ»: Ուրեմն ի՞նչն է փոխվել.

Վարկած 1. Հարությունյանը թասիբի է ընկել՝ տեսնելով, որ Անդրեաս Ղուկասյանի հացադուլը հետաքրքիր է անցնում:

Վարկած 2. Նախագահի մշտական թեկնածուն, նախապատրաստվում է նոր ռաունդի. եթե պետք եղավ «անհաղթահարելի խոչընդոտների» օպերացիայի շարունակությունը, Հարությունյանը կարող է օգտագործվել ըստ պահանջի:

Իսկ մինչ ԿԸՀ-ի աստիճաններին նստելն ու վաստակած հանգիստը վայելելը, նա ինչ- որ տարօրինակ մտքեր է արտահայտել այսօր իր ասուլիսի ընթացքում.

Մասնավորապես՝ նա ասել է, թե չի կարծում, որ լքում է մարտի դաշտը, ընդհակառակը՝ վստահ է, որ հենց ինքն է մնում. «Ես եմ մնալու տասնութից հետո, իրենք այսօր տուն-տունիկ են խաղում Սերժ Սարգսյանի հետ: Ով մնաց քվեաթերթիկում, 19-ին ասելու բան չի ունենալու, թեկնածուների մի մասը սկսելու է կակազել:  Տասնութից հետո այդ մարդիկ քաղաքական դաշտում չեն լինելու, ես եմ լինելու ու շատ մարդիկ»:

Բացի այդ, Արամ Հարությունյանը կանխատեսել է, որ ստեղծվելու է նոր իրավիճակ, լիդերների մի խումբ է ի հայտ գալու, որը  ժողովրդին այս իրավիճակից պետք է հանի: Նա կարծում է, որ իր առջև դրված նպատակին հասել է և քարոզարշավին հասցրել է իր ասելիքը տեղ հասցնել:

Իսկ հացադուլ անելու և ԿԸՀ-ի դիմաց նստելու նպատակը՝ մյուս թեկնածուներին թեկնածությունը հանելու կոչ անելն է:

Դե Արամ Հարությունյանը կոչ է անում համոզել Սերժ Սարգսյանին,  Հրանտ Բագրատյանին, Պարույր Հայրիկյանին և  Րաֆֆի Հովհաննիսյանին  հանել թեկնածությունը, իսկ մյուսներին ինքը կհամոզի:

Ինչպես ասում են՝  no comment: