Ինչպես ավելի վաղ «Հայկական Վարկած»-ը տեղեկացրել էր, ՀՀ նախագահի թեկնածու, ԱԻՄ ղեկավար Պարույր Հայրիկյանը չի դիմի Սահմանադրական դատարան, այսպիսով փետրվարի 18-ին նշանակված ՀՀ նախագահական ընտրությունները երկշաբաթյա ժամկետով չեն հետաձգվի: Այս մասին այսօր լրագրողների հետ հանդիպման ժամանակ  հայտարարել  է նաև Պարույր Հայրիկյանի փաստաբան Լևոն Բաղդասարյանը:

Նրա խոսքով, թեպետ անհաղթահարելի խոչընդոտներ առաջացել են, բայց այժմ նախագահի թեկնածուն որոշել է չի դիմել Սահմանադրական դատարան՝ նախագահական ընտրությունները հետաձգելու համար։

Հիշեցնենք, որ հունվարի 31-ին Տպագրիչների փողոցում արույր Հայրիկյանի դեմ մահափորձ էր կատարվել` իր տան դիմաց, որից հետո Հայրիկյանը հրազենային վնասվածքով տեղափոխվել էր «Սուրբ Գրիգոր Լուսավորիչ» հիվանդանոց:

Պարույր Հայրիկյանը, որպես նախագահի թեկնածու, հնարավորություն ուներ հետաձգել փետրվարի 18-ին նախատեսված ընտրությունները՝ ելնելով ՀՀ Սահմանադրության 52-րդ հոդվածից, որի համաձայն՝ հանրապետության նախագահի թեկնածուներից մեկի համար անհաղթահարելի խոչընդոտներ առաջանալու դեպքում հանրապետության նախագահի ընտրությունը հետաձգվում է երկշաբաթյա ժամկետով։ Անհաղթահարելի ճանաչված խոչընդոտները չվերանալու դեպքում նշանակվում է նոր ընտրություն, իսկ քվեարկությունն անցկացվում է նշված երկշաբաթյա ժամկետը լրանալուց հետո՝ քառասուներորդ օրը։ Մինչև քվեարկության օրը թեկնածուներից մեկի մահվան դեպքում նշանակվում է նոր ընտրություն, իսկ քվեարկությունն անցկացվում է նոր ընտրություն նշանակելուց հետո` քառասուներորդ օրը։