ԵԿՄ նախագահ Մանվել Գրիգորյանը հայտարարություն է տարածել, որում ասվում է.

«Հայաստանի նախագահի թեկնածուՊարույր Հայրիկյանի նկատմամբ կատարված մահափորձը  Հայաստանի Հանրապետության դեմ ուղղված ստոր հանցագործություն է:

Կրակոցները, որ հնչել են, ուղղված են եղել ընդդեմ հայոց պետականության և ակնհայտ նպատակ են ունեցել վարկաբեկելու մեր երկրում ընթացող օրինակելի քարոզարշավը: Այս արարքի հեղինակները հայոց պետականության, հայ ազգի թշնամիներ են:

Կոչ եմ անում երկրապահներին, Հայաստանի Հանրապետության բնակչությանը լինել առավել միասնական: Մշտապես հայը հաղթել է միասնականության շնորհիվ: Այդպես էր Արցախյան ազատամարտի օրերին: Այդպես պետք է լինի նաև այսօր և ապագայում:

Երկրապահները վստահ են, որ մեր իրավապահները ամենակարճ ժամկետներում կբացահայտեն այս նենգ սադրանքի հեղինակներին, և հանցագործներն իրենց արժանի պատիժը կստանան:

Շուտափույթ առողջացում եմ մաղթում Պարույր Հայրիկյանին, որն իր ողջ կյանքը նվիրել է հանուն Հայաստան պետության կայացման պայքարին և վստահ եմ` դեռ անելիք ունի լավ Հայաստանի կայացման վաղվա օրվա համար»: